Uchambuzi wa Miktadha ya Kijamii na Mchango Wake katika Ujifunzaji wa Kiswahili kama Lugha ya Pili Nchini Burundi

Makala hii inahusu miktadha ya kijamii na mchango wake katika kujifunza Kiswahili kama lugha ya pili nchini Burundi. Muktadha wa kijamii huathiri ujifunzaji wa lugha ya pili kwa kuchochea mawasiliano ya kuongea, kukuza,  na kuboresha matumizi halisi ya lugha katika mazingira ya kawaida (Ellis R., 2008). Hali hii ilimchochea mtafiti kufanya utafiti huu ili kubainisha miktadha ya kijamii iliyopo jijini Bujumbura na kuonesha mchango wake katika kujifunza Kiswahili kama lugha ya pili. Mbinu ya hojaji ilitumiwa kukusanya data.  Aidha, mbinu ya  usampulishaji tajwa ilitumika kuteua watoataarifa. Watoataarifa hao walikuwa wanafunzi 20 kutoka Chuo Kikuu cha Burundi, kiwango cha shahada ya  awali.  Nadharia ya Utamaduni Jamii iliyoasisiwa na Mwanasaikolojia Vygotsky (1978) iliongoza utafiti huu. Matokeo ya utafiti huu yamebainisha  kuwa miktadha ya kijamii ya kujifunza Kiswahili  jijini Bujumbura ni soko, hospitali, zahanati, nyumbani, na kadhalika. Matokeo pia yalionesha kuwa miktadha hiyo inawawezesha wanafunzi  kuingiza msamiati mpya, kukuza stadi za kusikiliza na kuzungumza. Inawawezesha pia, kuimarisha umilisi wa  utamaduni na maarifa kuhusu  fasihi. Serikali ya Burundi inaombwa kuchukua  miktadha ya kijamii  kama mikakati rasmi inayochangia kujifunza Kiswahili nchini. Mwisho, makala hii inapendekeza serikali ya Burundi iwezeshe walimu wa Kiswahili kufuatilia ujifunzaji wa Kiswahili wa wanafunzi  nje ya darasa.