ປັດໄຈທີ່ສົ່ງຜົນຕໍ່ການເຕີບໂຕຂອງວິສາຫະກິດຂະໜາດກາງ ແລະ ຂະໜາດນ້ອຍ ພາຍໃນນະຄອນໄກສອນພົມວິຫານ ແຂວງ ສະຫວັນນະເຂດ

ການວິໄຈໃນຄັ້ງນີ້ເປັນການວິໄຈໃນຫົວຂໍ້ ປັດໄຈທີ່ສົ່ງຜົນຕໍ່ການເຕີບໂຕຂອງວິສາຫະກິດຂະໜາດກາງ ແລະ ຂະໜາດນ້ອຍ ພາຍໃນນະຄອນໄກສອນພົມວິຫານ ແຂວງສະຫວັນນະເຂດ ໂດຍ​ມີ​ວັດ​ຖຸ​ປະ​ສົງ​ຂອງ​ການສຶກສາ ​ເພື່ອສຶກສາສະພາບການດຳເນີນວິສາຫະກິດຂະໜາດກາງ ແລະ ວິສາຫະກິດຂະໜາດນ້ອຍ ແລະ ປັດໄຈທີ່ສົ່ງຜົນຕໍ່ການເຕີບໂຕຂອງວິສາຫະກິດຂະໜາດກາງ ແລະ ວິສາຫະກິດຂະໜາດນ້ອຍ, ເຄື່ອງ​ມື​ທີ່​ໃຊ້​ໃນ​ການ​ວິ​ໄຈ​ຄັ້ງ​ນີ້​ແມ່ນແບບສອບຖາມ ໂດຍການສໍາພາດ ແລະ ໄດ້​ເກັບ​ກຳ​ລວບ​ລວມ​ຂໍ້​ມູນ​ພາກ​ສະ​ໝາມ​ດ້ວຍ​ການ​ສຸ່ມ​ຕົວ​ຢ່າງແບບເຈາະຈົງ ຈຳນວນ 285 ຫົວໜ່ວຍ, ຊຶ່ງສຶກສາໃນຮູບແບບຄຸນນະພາບ ແລະ ປະລິມານ, ​ໂດຍນໍາສະຖິຕິພັນລະນາໃນການວິເຄາະຫາ ຄ່າສ່ວນຮ້ອຍ, ຄ່າສະເລ່ຍ, ຄ່າຜັນປ່ຽນມາດຕະຖານ, ຄ່າສໍາປະສິດຂອງການກະຈາຍ ແລະ ວິເຄາະການຖົດຖອຍພະຫຸຄູນ (Multiple Regression Analysis) ໂດຍການນໍາໃຊ້​ໂປຣ​ແກຣມ SPSS. ຜົນການວິໄຈ ພົບວ່າ ສະພາບດ້ານງົບປະມານໃນການດໍາເນີນທຸລະກິດຂອງວິສາຫະກິດ ແມ່ນຢູ່ໃນລະດັບກາງ ໂດຍລວມມີຄ່າສະເລ່ຍ, ຄ່າຜັນປ່ຽນມາດຕະຖານ ແລະ ຄ່າສໍາປະສິດຂອງການກະຈາຍ ເທົ່າກັບ ( =3.24; S.D = 0.72; CV= 22.50%) ແຫຼ່ງເງິນທຶນໃນການປະກອບທຸລະກິດ ແມ່ນສ່ວນໃຫ່ຍແມ່ນທຶນຕົນເອງ ແລະ ສ່ວນໃຫ່ຍເປັນວິສາຫະກິດຂະໜາດນ້ອຍ, ຮອງລົງມາແມ່ນດ້ານຄວາມອາດສາມາດໃນການບໍລິຫານຄຸ້ມຄອງທຸລະກິດ ແມ່ນຢູ່ໃນລະດັບກາງ ໂດຍລວມມີຄ່າສະເລ່ຍ, ຄ່າຜັນປ່ຽນມາດຕະຖານ ແລະ ຄ່າສໍາປະສິດຂອງການກະຈາຍ ເທົ່າກັບ ( =3.23; S.D = 0.67; CV= 20.87%), ຖັດມາແມ່ນດ້ານການຕະຫຼາດຂອງທຸລະກິດ ແມ່ນຢູ່ໃນລະດັບກາງ ໂດຍລວມມີຄ່າສະເລ່ຍ, ຄ່າຜັນປ່ຽນມາດຕະຖານ ແລະ ຄ່າສໍາປະສິດຂອງການກະຈາຍ ເທົ່າກັບ ( =3.15; S.D = 0.70; CV= 22.30%), ຕໍ່ມາແມ່ນທຸລະກິດມີການເຕີບໂຕຂຶ້ນຕໍ່ເນື່ອງ ແມ່ນຢູ່ໃນລະດັບກາງ ໂດຍລວມມີຄ່າສະເລ່ຍ, ຄ່າຜັນປ່ຽນມາດຕະຖານ ແລະ ຄ່າສໍາປະສິດຂອງການກະຈາຍ ເທົ່າກັບ ( =3.13; S.D = 0.82; CV= 26.21%) ສ່ວນດ້ານການຮັບຮູ້ເຕັກໂນໂລຊີນະວັດຕະກຳຂອງວິສາຫະກິດ ແມ່ນຢູ່ໃນລະດັບກາງ ໂດຍລວມມີຄ່າສະເລ່ຍ, ຄ່າຜັນປ່ຽນມາດຕະຖານ ແລະ ຄ່າສໍາປະສິດຂອງການກະຈາຍ ເທົ່າກັບ ( =3.11; S.D = 0.69; CV= 22.32%). ສຳລັບບັນດາປັດໄຈທີ່ສົ່ງຜົນຕໍ່ການເຕີບໂຕໃນ 5 ປັດໄຈທີ່ໄດ້ຄົ້ນຄວ້າ ພົບວ່າມີພຽງ 3 ປັດໄຈຄື: ປັດໄຈດ້ານການຕະຫຼາດຂອງທຸລະກິດ, ດ້ານຄວາມອາດສາມາດໃນການບໍລິຫານຄຸ້ມຄອງວິສາຫະກິດ ແລະ ດ້ານຄວາມຮັບຮູ້ທາງດ້ານການບໍລິຫານງົບປະມານ ສົ່ງຜົນໃນທິດທາງບວກຕໍ່ການເຕີບໂຕຂອງ SMEs ພາຍໃນ ນະຄອນໄກສອນພົມວິຫານ ແຂວງສະຫວັນນະເຂດ ໂດຍສົ່ງຜົນຕໍ່ການເຕີບໂຕຂອງທຸລະກິດກວມເອົາ 72.50 % ໂດຍທີ່ປັດໄຈທາງດ້ານການຕະຫຼາດຂອງທຸລະກິດ ສົ່ງຜົນຕໍ່ການເຕີບໂຕຂອງ SMEs ສູງທີ່ສຸດ, ຮອງລົງມາແມ່ນປັດໄຈທາງດ້ານຄວາມອາດສາມາດໃນການບໍລິຫານຄຸ້ມຄອງທຸລະກິດ ແລະ ສຸດທ້າຍແມ່ນປັດໄຈທາງດ້ານຄວາມຮັບຮູ້ທາງດ້ານການບໍລິຫານງົບປະມານ.