ການຈັດການສິ່ງແວດລ້ອມ ແລະ ພະລັງງານ ຂອງໂຮງແຮມ ພາຍໃນນະຄອນຫຼວງພະບາງ ແຂວງຫຼວງພະບາງ

ການສິຶກສາເລື່ອງ ການຈັດການສິ່ງແວດລ້ອມ ແລະ ພະລັງງານ ຂອງໂຮງແຮມ ໃນນະຄອນ ຫຼວງພະບາງ ແຂວງ ຫຼວງພະບາງ ມີ 03 ຈຸດປະສົງ ຄື: (1) ສຶກສາກ່ຽວກັບການຈັດການສິ່ງແວດລ້ອມ ແລະ ພະລັງງານ, (2) ປັດໄຈທີ່ມີຜົນຕໍ່ການຈັດການສິ່ງແວດລ້ອມ ແລະ ພະລັງງານ ແລະ ບັນຫາ ແລະ (3) ແນວທາງການປັບປຸງການຈັດການສິ່ງແວດລ້ອມ ແລະ ພະລັງງານຂອງໂຮງແຮມຢູ່ພາຍໃນນະຄອນ ຫຼວງພະບາງ ແຂວງ ຫຼວງພະບາງ ໂດຍນໍາໃຊ້ວິທີການສຶກສາແບບປະສົມລະຫວ່າງປະລິມານ ແລະ ຄຸນະພາບ ເຊິ່ງກຸ່ມຕົວຢ່າງເຂົ້າຮ່ວມການຕອບແບບສອບຖາມທັງໝົດ40 ຄົນ ແລະ ເຂົ້າຮ່ວມການສຳພາດ 02 ຄົນ. ຜົນການສຶກສາພົບວ່າ: ການຈັດການສິ່ງແວດລ້ອມ ແລະ ພະລັງງານຂອງໂຮງແຮມໃນນະຄອນຫຼວງພະບາງ ແຂວງຫຼວງພະບາງແມ່ນປະຕິບັດໄດ້ດີພໍສົມຄວນບໍ່ວ່າຈະເປັນການຄັດແຍກຂີ້ເຫຍື້ອ, ການແຍກປະເພດຂອງຖັງໃສ່ຂີ້ເຫຍື້ອ, ການນໍາຂີ້ເຫຍື້ອປຽກມາໝັກເປັນຝຸ່ນ, ການນໍາກັບມາໃຊ້ຊໍ້າໃນບາງຢ່າງ ແລະ ການນໍາເອົາວັດຖຸດິບທີ່ຍ່ອຍສະຫຼາຍງ່າຍມາໃຊ້ ເພື່ອຫຼຸດຜ່ອນຂີ້ເຫຍື້ອໃນແຕ່ລະວັນ. ສ່ວນປັດໄຈທີ່ມີຜົນຕໍ່ການຈັດການສິ່ງແວດລ້ອມ ແລະ ພະລັງງານ ແມ່ນປະກອບດ້ວຍຫຼາຍປັດໄຈບໍ່ວ່າຈະເປັນການບໍລິຫານຂອງໂຮງແຮມໃນເຄື່ອ, ການໃຫ້ຄວາມຮ່ວມມືຂອງພະນັກງານໃນການຊ່ວຍກັນຈັດການສິ່ງແວດລ້ອມຂອງໂຮງ ແຮມ ແລະ ຄວາມໃສ່ໃຈການຈັດການສິ່ງແວດລ້ອມຂອງໂຮງແຮມຈາກເຈົ້າຂອງໂຮງແຮມ ລວມທັງການໃຫ້ການຮອງຮັບຈາກ    ໜ່ວຍງານທີ່ກ່ຽວຂ້ອງກັບການຈັດການສິ່ງແວດລ້ອມ  ແລະ ການບັງຄັບໃຊ້ກົດໝາຍລະບຽບການຕ່າງໆຂອງລັດຖະບານ ພ້ອມທັງປັດຈຸບັນແມ່ນກະແສການອານຸຮັກສິ່ງແວດລ້ອມ ເຊັ່ນ ການຫຼຸດພາວະໂລກຮ້ອນ. ສໍາລັບແນວທາງໃນການແກ້ໄຂບັນຫາສິ່ງແວດລ້ອມ ແລະ ພະລັງງານ ໃນສ່ວນຂອງສະຖານປະກອບການ ແລະ ສ່ວນຂອງພາກລັດມີລັກສະນະຄ້າຍຄືກັນ ບໍ່ວ່າຈະເປັນການໂຄສະນາ, ຝຶກອົບຮົມ, ເຜີຍແຜ ແລະ ແນະນໍາ, ຫຼັກການຂອງການຈັດການສິ່ງແວດລ້ອມທີ່ຖືກວິທີ, ຕໍ່ເນື່ອງຢ່າງເປັນປົກກະຕິ, ປູກຈິດສໍານຶກທີ່ດີໃຫ້ປະຊາຊົນ, ຊຸມຊົນໃກ້ຄຽງ, ພະນັກງານພາຍໃນໂຮງແຮມ ແລະ ມີການເຮັດວຽກຮ່ວມກັບຂະແໜ່ງ,  ໜ່ວຍງານ ແລະ ອົງການທີ່ກ່ຽວຂ້ອງ ເພື່ອເຮັດແນວໃດໃຫ້ວຽກງານຈອດກັນ. ຮອງລົງມາແມ່ນການປັບປ່ຽນການນໍາໃຊ້ພະລັງງານໄຟຟ້າມານໍາໃຊ້ພະລັງງານທົດແທນຈາກແສງອາທິດໃຫ້ຫຼາຍທີ່ສຸດ ແລະ ຫຼຸດປະລິມານຖົງພາດສະຕິກ, ເລັ່ງໃສ່ນໍາໃຊ້ຊັບພະຍາກອນທ້ອງຖິ່ນ ແລະ ປູກຕົ້ນໄມ້ເພີ່ມ. ພ້ອມດຽວກັນກໍນໍາໃຊ້ກົດໝາຍ, ລະບຽບການຕ່າງໆ ໃນການໃສ່ລະບຽບກັບບຸກຄົນ ຫຼື ສະຖານປະກອບການທີ່ບໍ່ປະຕິ ບັດລະບຽບວິໃນ. ສໍາລັບຜົນການທົດສອບສົມມຸດຖານ ເຫັນວ່າ ຜູ້ຕອບແບບສອບຖາມທີ່ມີ ເພດ, ອາຍຸ, ລະດັບການສຶກສາ ແລະ ຕໍ່າແໜ່ງຕ່າງກັນແມ່ນມີຄວາມຄິດເຫັນຄືກັນ.