تیۆری کۆمەڵگەرایی و کۆزمۆپۆلیتانیزم لەبەردەم ئاڵنگارییەکانی جیهانگیرییدا لێکۆڵینەوەیەکی شیکاریی - بەراوردکارییە

جیهانگیرییی یەکێکە لەو دیاردانەی کە ئامڕاز  و ئامانج و لێکەوتەکانی کاریگەری بەرچاویان لەسەر  ئایدۆلۆژیا سیاسییەکان و تیۆری پەیوەندییە نێودەوڵەتییەکان بەجێهێشتووە. ئەم توێژینەوەیە تیشک دەخاتە سەر ئاڵنگارییەکانی جیهانگیرییی لە ڕوانگەی هەردوو تیۆری کۆمەڵگەرایی و کۆزمۆپۆلیتانیزمەوە. ناوەڕۆکی توێژینەوەکە جەخت لەوە دەکاتەوە کە پرەنسیپەکانی جیهانگیریی بەشێوەیەکی گشتی ناتەبایە لەگەڵ بنەماکانی تیۆری کۆمەڵگەرایی، بەڵام تەبا و هاوتەریبە بە بنەماکانی کۆزمۆپۆلیتانیزم و بووەتە هۆی گەشەپێدانی زیاتری تیۆرەکە لە بواری پەیوەندییە نێودەوڵەتییەکاندا. دیارترین ئاڵنگارییەکانی جیهانگیریی لەبەردەم تیۆری کۆمەڵگەرایی و کۆزمۆپۆلیتانیزمدا بریتین لە سەروەریی دەوڵەت لەبەردەم مەترسیدا، واڵاکردن یاخود داخستنی سنوورەکان، پرسی بەها و کلتور و ناسنامە، دیاردەی کۆچی بەکۆمەڵ و مافی هاوڵاتیبوون. ئامانجی ئەم توێژینەوەیە دیاریکردنی چوارچێوەیەکی تیۆرییە بۆ ئەو ئاڵنگاریانەی جیهانگیریی کە بوونەتە هۆی گەشەپێدانی دیدگای کۆزمۆپۆلیتانیزم و بەرپەرچدانەوەی تێزەکانی کۆمەڵگەرایی. میتۆدی سەرەکی ئەم توێژینەوەیە بریتییە لە شیکاریی- بەراوردکاریی کە تیشک دەخاتە سەر شیکارکردنی ئاڵنگارییەکانی بەردەم هەردوو تیۆر و بەراوردکردنی دیدگای هەردوو تیۆری کۆمەڵگەرایی و کۆزمۆپۆلیتانیزم بۆ ئاڵنگارییەکان.