تیۆری شوناس لای فرانسیس فۆکۆیاما

تیۆری شوناس لای فرانسیس فۆکۆیاما پوختە: پرسی شوناس پەیوەستە بە هەموو کایەکانی ژیان و بوارەکانی زانست. لە ئێستادا ئەم پرسە بووەتە گرفت لەبەردەم وڵات و کۆمەڵگەکان. لە پێناوی چارەسەرکردنی ئەم گرفتە لە ناو تیۆرە سیاسییە هاوچەرخەکاندا، تیۆری زۆر لەبارەی شوناسەوە هەیە. فرانسیس فۆکۆیاما لە ناو ئایدۆلۆژیای لیبرال ديموكراسى، تیۆرێکی لەو بارەیەوە خستووەتە ڕوو. ئامانجی توێژینەوەکە تێگەیشتنە لەو تیۆرە، بۆیە پشت بە وەسفکردنی تیۆرەکەی فۆکۆیاما وەکو دیاردەیەکی سیاسی کراوە.  فۆکۆیاما تیۆری شوناسی لەسەر چەمکی تیمۆس (Thymos) بونیاد ناوە کە واتای ئارەزووی مرۆڤە بۆ دان پێدانان بە شکۆمەندیەکەی و ئەو شکۆمەندیەش لە ناو لیبرال دیموکراسیدایە. فۆکۆیاما شوناسی نەتەوەیی بە کڕۆکی بونیادنانی نەتەوە هەژمار دەکات و دەکرێت ئەو جۆرە شوناسە لە ڕێگەکانی دەستوور، پەروەردە یان بەها سیاسییەکان دروست بکرێت. فۆکۆیاما دژایەتی سیاسەتەکانی شوناس دەکات و پێی وایە لە زیانی تاک و قازانجی گروپەکانە و دەبێتە هۆی دابەشبوونی کۆمەڵگاکان لە جیاتی یەکگرتنیان. فۆکۆیاما گەیشتووەتە ئەو بڕوایەی فرەکولتوری لە ڕێڕەوی ئاسایی خۆی لایداوە و ئێستا ئامرازێکە بۆ پەرتەوازەکردنی کۆمەڵگەکانی لیبرالی. وشە سەرەکییەکان: فۆکۆیاما، شوناس، شوناسی نەتەوەیی ، سیاسەتەکانی شوناس، فرەکولتوری.