کارامەیی پەیوەندیکردن و دەروون دروستی لای خوێندكارانی زانکۆ

      ئامانجی سەرەكی ئەم توێژینەوەیە بریتییە لە دەرخستنی پەیوەندی نێوان كارامەیی پەیوەنییكردن و دەروون دروستی لای خوێندكارانی زانكۆ و پێوانەكردنی ئاستی هەردوو گۆڕاوەكە، هاوكات دەرخستنی ڕۆڵی گۆڕاوە دیمۆگڕافییەكانی ( ڕەگەز ، باری ئابووری خێزان) لەسەر ئاستی گۆڕاوەكانی توێژینەوەكە، بۆ شیكردنەوەی ئامانجەكانیش توێژەران سوودیان لە میتۆدی وەسفی بەڕێگەی ڕوپێوی كۆمەڵایەتی بە نموونە وەرگرتووە.  بۆ ئەو مەبەستەش فۆڕمێكی ڕاپرسیان ئامادەكردووە، بەجۆرێك پێوەری كارامەیی پەیوەندیكردن لە (18) بڕگە، پێوەری دەروون دروستیش لە ( 18) بڕگە پێكهاتووە، كە تەواوی تایبەتمەندییە سایكۆسۆسیۆمەترییەكان  بۆ هەردوو پێوەرەكە ئەنجام دراوە. هاوكات بە شێوەیەكی هەڕەمەكی چینایەتی ڕێژەیی نموونەیەكەی (400) خوێندكار لە زانكۆی كۆییە وەرگیراوە. بەجۆرێك (210) خوێندكاری ڕەگەزی مێ و (190) خوێندكاریش ڕەگەزی نێر.  بۆ شیكردنەوەی داتا بە دەستهاتووەكانیش توێژەران پرۆگرامی (spss) یان بەكارهێناوە.  گرنگترین ئەو ئەنجامانەی ئەم توێژینەوەیە  پێی گەیشتووە برتییە لە:  بە شێوەیەكی گشتی  كارامەیی پەیوەندیكردن و دەروون دروستی لای نموونەی توێژینەوەكە لە ئاستێكی بەرزدایە.  هەروەها دەركەوتووە هیچ جیاوازیەكی بەڵگەداری ئاماری لە نێوان ڕەگەزی نێر و مێدا نییە سەبارەت بە ئاستی كارامەیی پەوەندیكردن و دەروون دورستی.  هاوكات دەركەوتووە ئەو خوێندكارانەی ئاستی ئابووری خێزانەكانیان باشە ئەوا كارامەیی پەیوەندیكردن و دەروون دروستیان بەرزترە بەبەراود بەو خوێندكارانەی ئاستی ئابووری خێزانەكانیان خراپ و یاخود مامناوەندە. لە كۆتایشدا دەركەوتووە پەیوەندیەكی بەڵگەداری ڕاستەوانە سەرو ناوەن لە نێوان كارامەیی پەیوەندیكردن و دەروون درووستیدا هەیە.