هەڵسەنگاندنی ڕێگاکانی وانەوتنەوەی بابەتی سۆڵفێج لە کۆلێژی هونەرەجوانەکان

ئەم توێژینەوەیە توێژینەوەیەکی وەسفیی شیکارییە، بۆ هەڵسەنگاندن و بەدواداچوونی ڕابردوو و ئێستای خوێندنی بابەتی سۆڵفێج لە کۆلێژی هونەرە جوانەکانی زانکۆی سەلاحەدین ئەنجامدراوە. بەتایبەت لێکۆڵینەوە لە شێوازی بەکارهێنان و پەیرەوکردنی ڕێگاکانی وانەوتنەوەی سۆلفێج لەلایەن مامۆستایانی بابەت. ئامانجی ئەم توێژینەوەیە، زانینی ڕادەی بەکارهێنان و کارایی ڕێگاکانی وانەوتنەوەی سۆلفێجە بەشێوەیەکی کرداریی لەلایەن مامۆستایانی بابەت، کە تا چەند خراونەتە خزمەت پەرەپێدانی توانای قوتابییان و بەدەستهێنانی کارامەییەکانی فێربوون. هەروەها لەهەمان کاتدا دەستنیشانکردنی کەموکووڕییەکان و خاڵە لاوازەکان. بۆ ئەم مەبەستە توێژەران فۆڕمێکی ڕاپرسییان وەک ئامرازی لێکۆڵینەوە خستۆتە بەردەستی ئەو پسپۆڕ و مامۆستایانەی، کە لەماوەی ساڵانی ڕابردوو و لە ئێستادا بابەتی سۆلفێج لە قۆناغە جیاوازەکانی بەشی موزیک دەڵێنەوە یان بڕوانامەکانیان لە بابەتی سۆلفێج بەدەستهێناوە. دوای گەیشتن بە ئەنجامەکانی ڕاپرسی، توێژەران ئامانج، مەبەست و گرنگی ڕێگا و شێوازەکانیان لە بەدەستهێنانی کارامەیی فێربوون لە قوتابییان ڕوونکردووتەوە، بەتایبەتی لە بوارەکانی وەک گۆرانی وتن و تەکنیکی بەهێزکردنی یادگەی موزیکی قوتابییان. هەروەها ئەم پێشنیاز و ڕاسپاردانەشیان خستۆتەڕوو، کە بەهۆی بەکارهێنانی ئەم ڕێبازانە و بەستنەوەیان بە ئامراز و تەکنەلۆژیا مۆدێرنەکان، دەبن بە هۆکاری نوێکردنەوەی پڕۆگرامەکان و خۆشەویستکردنی بابەتی سۆلفێج لای قوتابییان و بەستنەوەی هەردوو بەشی تیۆری و پراکتیکی بەیەکەوە.