بەلاهوتیكردنەوەی سیاسەت

پوختە   بابەتی سەرەکی ئەم توێژینەوەیە ئاوڕدانەوەیە لە تیۆریی کارل شمیت سەبارەت بە بواری سیاسی the Political، و تێگەیشتنی ئەو بۆ کێشەزای بنەڕەتی دەوڵەتی مۆدێرن وەک بەرەنجامی رۆشنگەری و مۆدێرنیتە. هاوکات تیشک دەخەینە سەر ئەو رەخنە ریشەییانەی ئاراستەی هزری لیبڕاڵی دەکات لە پەیوەندی بە لاهوتی سیاسی و قۆناغە مێژووییەکان یان پانتایی سەنتەری گۆڕاو لەسەر بەرهەمهێنانی شەرعیەت. توخمە سەرەکییەکانی  هزری شمیت لەمەڕ سیاسەت، لە دەوری "ئاوارتە (الاستثناء)" و " سەروەری" و "بڕیار" دەخولێتەوە، ئاست و  پێگەی ئەم تێرمانە لە پێناسەکردنی دەوڵەت و شوێنگەی بواری ئابووری و کۆمەڵایەتی و ئەخلاقی و هتد، رەسەنبوونی بواری سیاسی نمایان دەکات.   لاهوتی سیاسی لە رونگەی شمیت وەک خاڵی بەرانبەری بانگەشەی بەعەقڵانیکردن و بەدونیاییکردنی دەوڵەتی مۆدێرن بە ژێربونیاد ناوزەد دەکەین و توێژینەوەکە ئەم تێزە بەکاردێنێت بۆ تێگەیشتن لە جێکەوتی پرۆسسی بەلاهوتیکردنەوەی سیاسەتی هاوچەرخ و بانگەشە بنەڕەتییەکانی سەبارەت بە پەیوەندی نێوان خەمساردی و بێزاری لە دیموکراسی و سیستەمی نوێنەرایەتی و بەئابووریکردنی بواری سیاسی لەلایەک و دەرکەوتەکانی هەڵبژاردن و گوتاری مافی گەردوونی مرۆڤ و ئاپۆڕای خۆپێشاندان وەک جۆرێک لە سرووتی لاهوتی کە بە سەربونیاد ناودێرکراوە.