ڕه‌وتی گه‌شه‌سه‌ندنی چیرۆك لای ژنه‌چیرۆكنووسانی كوررد و فارس

توێژینه‌وه‌ی به‌رده‌ست توێژینه‌وه‌یه‌كی مێژوویی-به‌راوردكارییه‌ به‌ناونیشانی: "ڕه‌وتی گه‌شه‌سه‌ندنی چیرۆك لای ژنه‌چیرۆكنووسانی كورد و فارس"، له‌سه‌ره‌تاكانی ده‌ركه‌وتنه‌وه‌ تا گه‌شه‌سه‌ندن و پێشكه‌وتن. دابه‌شی سێ به‌شكراوه‌، به‌شی یه‌كه‌م: خۆی له‌پێشه‌كییه‌ك ده‌بینێته‌وه‌ كه‌ سه‌رجه‌م گرنگی و ئامانج و كێشه‌ و میتۆدی توێژینه‌وه‌كه‌ی له‌خۆگرتووه‌، به‌شی دووه‌م: ته‌رخانكراوه‌ بۆ قۆناغه‌كانی سه‌رهه‌ڵدانی چیرۆك له‌سه‌رده‌ستی ژنان له‌ ئه‌ده‌بی كوردیدا، كه‌ خۆیان له‌ قۆناغه‌كانی (ده‌سپێك، گه‌شه‌سه‌ندن و پێشكه‌وتن)دا ده‌بیننه‌وه‌؛ سیما و خه‌سڵه‌تی هه‌ر قۆناغێك به‌وردی دیاریكراوه‌ و په‌نجه‌ی ئاماژه‌ بۆ چیرۆكنووسانی ‌هه‌ر قۆناغێك ڕاكێشراوه‌. هه‌رچی به‌شی دووه‌می توێژینه‌وه‌كه‌یه‌ به‌هه‌مان شێوه‌ قۆناغه‌كانی گه‌شه‌سه‌ندنی چیرۆكی ژنانی فارس دیاریكراوه‌‌؛ به‌سه‌ر هه‌ر سێ قۆناغه‌كانی "ده‌سپێك و درێژه‌دان و سه‌رده‌میكی تازه"دا جیاكراوه‌ته‌وه‌ و سیما و خه‌سڵه‌تی هه‌ر قۆناغێك دیاریكراوه‌، ڕابه‌ر و سه‌رترۆپكی ژنه‌چیرۆكنووسانی قۆناغه‌كانیش ئاماژه‌یان بۆكراوه‌. له‌كۆی پڕۆسه‌ی توێژینه‌وه‌كه‌دا به‌پشت به‌ستن به‌ میتۆدی مێژووی-به‌رواردكاری قۆناغه‌كانی گه‌شه‌سه‌ندنی چیرۆكی هه‌ردوو ئه‌ده‌به‌كه‌ شیكراوه‌ته‌وه‌؛ ئه‌وه‌ ده‌رده‌كه‌وێت كه‌ چۆنیه‌تی گه‌شه‌سه‌ندنی چیرۆك له‌هه‌ر دوو ئه‌ده‌به‌كه‌دا به‌هۆی نزیكی ناوچه‌یی و كلتوورییه‌وه‌ هاوبه‌شیه‌كی زۆر هه‌یه‌، له‌وانه ده‌سپێكی چیرۆكنووسی لای ژنان له‌هه‌ردوو ئه‌ده‌به‌كه‌دا شوێنپێی پیاوانیان له‌نووسیندا هه‌ڵگرتووه و به‌قۆناغی لاسایكردنه‌وه‌ ناوده‌برێت‌، له‌قۆناغی دووه‌مدا زیاتر گه‌ڕاون به‌شوێن ناسنامه‌ی ژنبوونه‌وه‌، قۆناغی سێیه‌م: قۆناغی پێشكه‌وتن و ده‌ركه‌وتنی ژنانه‌نووسییه‌ له‌هه‌ر دوو ئه‌ده‌به‌كه‌دا.