شێوازی ژنانه‌ له‌چیرۆكی ژنه‌چیرۆكنووسانی كورد و فارس

ئه‌م توێژینه‌وه‌یه‌ به‌ ناونیشانی "شێوازی ژنانه‌ له‌چیرۆكی ژنه‌ چیرۆكنووسانی كورد و فارس" هه‌وڵێكه‌ بۆ ده‌ستنیشانكردنی شێوازی نووسین‌ له‌چیرۆكی ژنه‌چیرۆكنووسانی كورد و فارس؛ چیرۆكی ژنانه‌ وه‌ك ژانرێكی ئه‌ده‌بی كه‌ قالب و چوارچێوه‌یه‌گی دیاریكراوی هه‌یه‌ و به‌زمانێكی ژنانه‌وه‌ ده‌گێڕدرێته‌وه‌ و به‌شێك له‌و تایبه‌تییانه‌ی له‌زمانی ئه‌م گێڕانه‌وه‌یه‌دا هه‌یه‌ ده‌كرێت ‌نووسینه‌كانی ئه‌وان له‌نووسینی پیاوان جیابكاته‌وه‌؛ ئه‌وان له‌نووسینه‌كانیاندا په‌نا بۆ وشه‌ و ڕسته‌گه‌لێك ده‌به‌ن كه‌ په‌یوه‌ستن به‌ بیر و هزر و ئه‌و ده‌وروبه‌ره‌وه‌ كه‌ تیایدا ده‌ژین، له‌وانه‌: كه‌م چیرۆكی ژنانه‌ هه‌یه‌ ده‌یان وشه‌ و ناوی تایبه‌ت به‌ ماڵداری، ئارایش، كه‌ل و په‌لی جوانكاری و دایكایه‌تی ... له‌خۆنه‌گرێت، یاخود وه‌ك چۆن ئه‌وان له‌ڕاستیدا وردبینن و ده‌چنه‌ نێو ورده‌كاری شته‌كانه‌وه‌؛ بۆ ئه‌م مه‌به‌سته‌ زیاتر سود له‌ وشه‌ڕه‌نگه‌كان وه‌رده‌گرن، تا زیاتر له‌وه‌سفه‌كان وردببنه‌وه‌. هه‌روه‌ها له‌ئاستی ڕسته‌سازیشدا زیاتر نووسنه‌كانیان ڕه‌وان و پاراوه‌ و سوود له‌ڕسته‌ی كورت و ساده‌ وه‌رده‌گرن و ئامرازه‌كانی گومانكردن له‌نێو ڕسته‌كانی ئه‌واندا زۆرن. له‌ئاستی گوتاردا ده‌ربڕینه‌كانی ئه‌وان پڕن له‌ هه‌ست، نه‌فره‌ت و نزا و هێمای نازمانی، بۆ ده‌ستنیشانكردنی ئه‌م جیاوازیانه‌ له‌ چیرۆكی ژنه‌ چیرۆكنووسانی كورد و فارسدا به‌پشت به‌ستن به‌ میتۆدی به‌راوردكاری ده‌كرێت به‌ له‌به‌رچاوگرتنی ده‌قه‌كانی ئه‌وان له‌ئاستی وشه‌ و ڕسته‌ و گوتاردا ئه‌م جیاوازیانه‌ له‌ شێوازی ژنانه‌دا بدۆزینه‌وه‌