فرەدەنگی لە ڕۆمانی "تەرمەوان" لە ڕوانگەی "میخائیل باختین"ەوە

فرەدەنگی "پۆلیفۆنی" پێگەیەکی گرنگیی لە بواری ڕەخنەی ئەدەبی و تیۆری ڕۆماندا هەیە. ئەم تەکنیکە سەرەتا لە لایەن ڕەخنەگر و تیۆردانەری ڕووسی "میخائیل باختین"ەوە دادەڕێژرێت، كە لە شیکردنەوەی بەرهەمەکانی "دیستۆیڤسکی"دا پڕاكتیزەی دەكات. دواتر ڕەخنەگر و ڕۆماننووسە پۆستمۆدێرنیستەكان بەگەرمییەوە بەرەو ئەو تەكنیكە دەچن. فرەدەنگی وەک تەكنیكێكی گێڕانەوە، تا ڕادەیەك بنەمای تاکدەنگیی لە ڕۆمانی کلاسیکی دا تێكدەشکێنێت، کە تیایدا یەک دەنگی زاڵ "دەنگی ڕۆماننووس، یان گێڕەڕەوەی سەرەکی" ئایدیۆلۆژیا و بیر و بۆچوونەكانی بەسەر هەموو دەنگەکانی دیكەدا دەسەپێنێت. لە بەرامبەردا، ڕۆمانی فرەدەنگی ڕێگە بە چەندین دەنگی سەربەخۆ دەدات هەریەکەیان خاوەنی گۆشەنیگا و ئایدیۆلۆژیا و زمانی تایبەت بە خۆیان بن، بەبێ ئەوەی هیچ دەنگێک لە لایەن دەنگێکی دیكەوە کپبکرێت. ئەم توێژینەوەیە، بە ناونیشانی "فرەدەنگی لە ڕۆمانی "تەرمەوان" لە ڕوانگەی "میخائیل باختین"ەوە"یە، ئامانجی خستەنەڕووی تەكنیكی فرەدەنگییە لەو ڕۆمانەی ڕۆماننووس "كاروان كاكەسوور"، بە پێی بنەما و تیۆری فرەدەنگی "باختین"ی لە ڕووی "فرەیی كارەكتەر، فرەیی زمان، فرەیی ئایدۆلۆژیا". توێژینەوەكە دەگات بەوەی، كە ڕۆماننووس هەوڵیداوە، بنەماكانی فرەدەنگیی لە ڕۆمانەكەیدا پڕاكتیزەبكات. كە تیایدا كارەكتەرەكان بە ئازادی بیروڕا و ئایدیۆلۆژیای خۆیان دەخەنەڕوو، بەشێك لە گێڕانەوەی ڕووداوەكان لە ئەستۆدەگرن.