ناسنامە و جیاوازی لە ڕۆمانی کوردیدا

پوختە: ناسنامە و جیاوازی، دوو چەمکن کار لەبارەی دەرخستنی ناسنامە و جیاوازی کارەکتەر دەکەن، ئاخۆ  کارەکتەر کاتێک بەر ناسنامە و کولتووری تر دەکەوێت، چۆن خۆی دەنوێنێت. ئەم توێژینەوەی ئێمە کارکردنە لەبارەی کارەکتەری پەناهەندە، واتە ئەو ڕۆمانە کوردییانەی باس لە پەناهەندەیی دەکەن لیرەدا وەک نموونە وەرگیراون. ئاشکرایە کارەکتەری پەناهەندە بەردەوام دەیەوێت پارێزگاری لە ناسنامەی خۆی بکات، لەگەڵ ئەوەشدا کاتێک بەر ناسنامەی جیاوازی ئەوی تر دەکەوێت، ئەوا ناسنامەی خۆی دەسەلمێنێت. ئەو سەلماندن و نواندنەوەیە بە شێوەی ڕاستەوخۆ یان ناراستەوخۆ بێت. ئەم توێژینەوەیە کار لەبارەی نواندنەوەی کارەکتەری پەناهەندە دەکات، بەتایبەتی لە ڕۆمانی کوردیدا. کارەکتەری پەناهەندە لەناو فەزایەکی جیاواز هەموو هەوڵێکی بۆ ئەوەیە خۆی ون نەکات. کەواتە گرفتی سەرەکی لەم توێژینەوەیە، گرفتی ناسنامەیە، چونکە ناسنامە دەبێتە خاڵی جیاوازی لە نێوان کارەکتەری پەناهەندە و ئەوانی تر. هەر لەو ڕێگەیەشەوە ئێمە دەمانەوێت ململانێی نێوان کارەکتەری پەناهەندە و ئەوی تر دەربخەین بۆ ئەوەی ناسنامەی هەردوو لایان بخەینەڕوو.