تەکنیک و پێڕفۆرمەنسی ئامێری کەمانچە لەموزیکی کوردیدا

پوخته لەم توێژینەوەیەدا هەوڵدراوە شیکارییەکی ورد بۆ تەکنیک و پێرفۆرمەنسی ئامێری کەمانچە بکەین لەموزیکی کوردیدا. بەپشت بەستن بەکۆمەڵێک سەرچاوەی جیاواز بەوردی لەسەر مێژووی ئامێری کەمانچە وەستاوین لەلایەن ئەو نەتەوانەی کە ئەم ئامێرە بەکاردێنن، هەوڵدراوە زانیاری ورد و دروست سەبارەت بە مێژووی دێرینی ئەو ئامێرە بخەینەروو، بەسوود وەرگرتن لەسەرچاوەکان و دیدارو چاوپێکەوتن لەگەڵ وەستا دەستڕەنگینەکان، بەوردی ئاماژە بەئەندازە و بەشەکانی ئامێری کەمانچە کراوە. توێژەران لەڕێگەی هەڵبژاردن وشیکردنەوەی نموونەیەک هەوڵیانداوە  شێوازی تەکنیک و پێڕفۆڕمەنسی وردی  ژەنینی کەمانچە بخەنەروو، بەتایبەت تەکنیکە کانی کەوان و پەنجە، میلۆدی و ڕیتمەکان، داینەمیک و جوانکارییەکان، کە تەنیا لەڕێگەی ئەو هەنگاوە زانستیانەوە بەسەرەداوی تێگەیشتن و خستنە رووی ئەو جیاوازیانەوە دەگەین  لەشێوازی پێڕفۆڕمەنسی کردن و تواناکانی ئامێری کەمانچە لەناو کایەی موزیکی کوردیدا. هەموو ئەمانەش بەیەکەوە کاریگەریان دەبێت بۆ فۆرم وستراکچەری موزیکی کوردی  و پاراستن و گەشەپێدانی میراتی موزیکی کوردی. بەگشتی ئامانج لەم توێژینەوەیە: نیشاندان و خستنەرووی تایبەتمەندیی و توانا تەکنیکییەکانی ئامێری کەمانچە و پێشکەشکردنی زانیاری پڕبایەخە لەسەر یەکێک لە گرنگترین ئامێرەکانی موزیکی کوردی، بە شێوەیەک  ببێتە سەرچاوەیەکی گرنگ بۆ موزیکژەنان، توێژەران و ئەوانەی خولیاو ئارەزوی زانست و زانیارین لەسەر ئامێرەکانی موزیکی کوردی بەگشتی.دواجار ئەو هەولەمان ببێتە دەستپێکێکی زانستی لەپێناو پاراستنی ئەم میراتە هونەرییە وگەشەپێدانی لەچوار چێوەیەکی زانستی هاوچەرخدا.