بەکارهێنان و بەرجەستەکردنی ڕیتم و میلۆدی کەلەپووری لە موزیکی نەتەوەیی ئەوروپای ڕۆژهەڵاتدا.

پوختە توێژینەوەیەکی وەسفی شیکارییە، سەبارەت بە بەکارهێنان و  بەرجەستەکردنی ڕیتم و سەما و  میلۆدی کەلەپووری لە موزیکی نەتەوەیی ئەوروپای ڕۆژهەڵاتدا، کە شیکارییەکی گشتی بۆ خستنەکار و بەرجەستەکردنی ئەم توخمانە لە کەلتووری وڵاتانی ئەوروپای ڕۆژهەڵات، لە موزیکی کلاسیکی و فۆڕمەکانی موزیکی ئەوروپای ڕۆژئاوادا دەکات. کرداری خستنەکار و بەرجەستەکردنی ڕیتم و میلۆدی و سەمای نەریتی یان کەلەپووری، ئاراستەیەکی فراوانی کارکردنی موزیکی نەتەوەیی (Nationalism) ی سەردەمی ڕۆمانتیک بوو، کە لەکۆتاییەکانی سەدەی نۆزدەهەم و سەرەتای سەدەی بیستەمدا، موزیکی سەرجەم گەلانی سەرڕووی زەوی و ئەوروپای ڕۆژئاوای بەتایبەت تەنییەوە. (Mayes, 2014). بێگومان ناڕوونی و کەمی توێژینەوەی کوردی بۆ ڕوونکردنەوە و شیکردنەوەی ئەم پڕاکتیزە و  ئاراستە کارکردنەی موزیکدانەرانی جیهانی، هۆکاری سەرەکی ئەنجامدانی ئەم توێژینەوەیە بوو. چوونکە ئاشنابوون بە قوتابخانەکانی موزیکی نەتەوەیی ئەرووپی، سوودێکی یەکجار گەورە بە موزیککارانی کورد دەگەیەنیت، کە بەهۆی نەبوونی کیانی سەربەخۆ هێشتان موزیکی کەلەپووریمان لە ژێر مەترسی و داگیرکاری وڵاتانی ئیقلیمی دایە. بۆ ئێمەی کورد ئەرکێکی گرنگ و لە پێشینەیە، کە بەسوود وەرگرتن لە ئەزموونی قوتابخانە نەتەوەییەکانی موزیکی ڕۆژئاوایی، هاوشێوەی گەلانی جیهان میراتی میلۆدی و ڕیتمی کەلەپووریمان لە رێگەی داڕشتنەوەیان لە فۆڕمی موزیکی نوێدا بپارێزین و بیانخەینە سەر تەختی شانۆ. لەهەمان کاتدا چەمکی ڕەسەنیەتی تێکەڵ بە هاوچەرخیەتی موزیک بکەین و ناسنامەی نەتەوەییمان لەموزیکی ئۆرکێسترایی پیشانی دنیا بدەین.