ڕۆڵ و پێگەی ڕیتم و میلۆدی گۆرانی کەلەپووری لە موزیکی ئەوروپای ڕۆژئاوادا

ئەم هەوڵە توێژینەوەیەکی وەسفی شیکارییە، سەبارەت بە ڕۆڵ و پێگەی ڕیتم و میلۆدی گۆرانی کەلەپووری لە موزیکی ئەوروپای ڕۆژئاوادا، کە شیکارییەکی گشتی بۆ خستنەکار و بەرجەستەکردنی ئەم توخمانەی گۆرانی لەلایەن دانەرانی ئەوروپای ڕۆژئاوا، بە درێژایی سەردەمەکانی مێژووی موزیکی ڕۆژئاوا دەکات. کرداری خستنەکار و بەرجەستەکردنی میلۆدی و سەمای نەریتی، ئاراستەیەکی فراوانی کارکردنی موزیکییە  لە موزیکی سەرجەم گەلانی سەرڕووی زەوی و ئەوروپای ڕۆژئاوا وەک پێشەنگێک لەم بوارەدا. بێگومان ناڕوونی و کەمی توێژینەوەی کوردی بۆ ڕوونکردنەوە و شیکردنەوەی ئەم پڕاکتیزەیە لە موزیکدانەرانی ڕؤژئاوا، هۆکاری سەرەکی ئەنجامدانی ئەم توێژینەوەیە بوو. چوونکە ئاشنابوون بەم شێوازەی کارکردن، بۆ ئێمەی کورد ئەرکێکی گرنگ و لە پێشینەیە، بۆئەوەی بتوانین هاوشێوەی گەلانی جیهان میراتی میلۆدی و ڕیتمی کەلەپووریمان لە رێگەی داڕشتنەوەیان لە فۆڕمی نوێدا بپارێزین و بیانبەینە سەر تەختی شانۆ. لەهەمان کاتدا چەمکی ڕەسەنیەتی تێکەڵ بە هاوچەرخیەتی موزیک بکەین و ناسنامەی نەتەوەییمان پیشانی دنیا بدەین.