میکانیزمەکانی مەیلگۆڕین لە وتاری سیاسیی کوردیدا

پوختە: مەیلگۆڕین ئەو وروژێنەرانەن، کە لە ڕێگای زمانەوە کار لە هەست و سۆزی وەرگر دەکەن و ئاراستەی بیرکردنەوەی دەگۆڕن. کۆمەڵێک میکانیزمی زمانی دەتوانن ئەو ئەرکە بەجێبگەیەنن، کە نێرەر(قسەکەر) بەهۆیانەوە هەوڵی کۆنترۆڵکردنی وەرگر و ئاراستەکردنی دەدات. ئەم توێژینەوەیە، کە بە ناونیشانی (میکانیزمەکانی مەیلگۆڕین لە وتاری سیاسیی کوردیدا) نوسراوە، باس لە میکانیزمە جیاوازەکانی مەیلگۆڕین(الاستمالةCaptation, ) دەکات لە چوارچێوەی هەوڵە جیاوازەکانی قسەکەر بۆ ڕازیکردنی وەرگر. توێژینەوەکەمان تایبەت کردووە بە وتاری سیاسیی کوردی، لە ماوەیەکی دیریکراودا، کە ماوەی بانگەشەی هەڵبژاردنی پەرلەمانی کوردستانە لە ئۆکتۆبەری ساڵی (٢٠٢٤). توێژینەوەکە بنەما تیۆرییەکانی ڕازیکردن بەگشتی و مەیلگۆڕین بەتایبەتی دەستنیشان دەکات، پاشان لەژێر ڕۆشنایی ئەو بنەما تیۆرییانەدا شیکردنەوە بۆ وتاری سیاسیی کوردی دەکات و بنەما و میکانیزمەکان دیاردەکات. هەروەها لەسەر بنەمای ڕێژە و ڕادەی بەکارهێنانی هەر بنەمایەکی ناو تیۆرەکە لە وتارەکاندا، شیکردنەوە و لێکدانەوە بۆ (وتاری سیاسیی کوردی و پلان و سیاسەتی ڕازیکردن لای وتاربێژانی سیاسی) دەکات. وشە سەرەکییەکان: ڕازیکردن، مەیلگۆڕین، دروشم، پەیوەندیی سیاسی، وتاری سیاسی.