ململانێی کولتووریی لە ڕۆمانى هوتێل ئەوڕوپا"ـی "فەرهاد پیرباڵ"دا

پوخته ڕۆمانی "هۆتێل ئه ورووپا" یەکێکە لە نموونە جوان و دیارەکانی شوێنکاتی کۆچ و ئاوارەیی و تاراوگەنشینی لە ئەدەبی هاوچەرخی کوردی، پرسی ململانێی کولتووریی بەشێوەیەکی قووڵ و فرەچین وێنا دەکات. ڕووداوەکانی ڕۆمانەکە لە بیرکردنەوە و ژینگەیەکی ئەوروپی و بە تایبەتی لە "پاریس" ڕوودەدەن،  کارەکتەری سەرەکیی لە نێوان ناسنامەی کوردایەتیی خۆی و کولتوورە باڵادەستەکەی ڕۆژئاوادا بەردەوام لە ململانێ دایە. ڕۆمانەکە بەشێوەیەکی ڕەخنەگرانە و گاڵتەجاڕانە مامەڵە لەگەڵ بەریەککەوتن و ڕووبەڕووبوونەوەی دوو کولتووریی نایەکسان دەکات، لە لایەک کولتووری کوردیی بە ڕەگوڕیشەی نەریتیی و یادەوەری مێژوویی و ناسنامە، لە لایەکی دیکەشەوە کولتووری ئەوروپیی کە بە پێکهاتەیەکی نوێگەرانە و زانستخوازانە و دوور لە دەسەڵاتی ئایین و ئارەزومەندانە پێناسە دەکرێت. ئەم ململانێیە نەک هەر لە ئاستی زمان و ڕەفتاری ڕۆژانەدا، بەڵکو قووڵتر لە ئاستێکی ناسنامە و هەستی سەربەخۆیی و تێگەیشتنی کولتووریشدا دەردەکەوێت.