Tubalin Yabon Mata a Wasu Waƙoƙin Alhaji Musa Ɗanƙwairo

Babbar manufar wannan takarda ita ce fito da matsayin mata a wasu waƙoƙin Alhaji Musa Ɗanƙwairo ta sigar yabo. Dalilin da ya sa mutane ba su yi rubutu sosai ba, saboda hankali bai koma kai ba. Akwai wani ilimi a ɓoye, wanda makaɗa suke bijiro da shi, wanda in an yi nazarin sa za a samu ƙaruwa wajen rubutun yau da kullum. Don rayuwar al’umma da sauran su a fagen nazari. An ɗora wannan binciken a kan ra’in Waƙar Baka Bahaushiya (WBB) wadda Gusau (2015) ya assasa. Wanda yake Magana musamman a kan sanin sunan makaɗi da tarihinsa da kuma ayyana tubulin ginin turke, kamar yadda aka kawo cikin wannan nazari. A wajen tattara bayanai an yi amfani da hanyoyi mabambanta kamar sauraren kaset-kaset na waƙoƙin Alhaji Musa Ɗanƙwairo, musamman waɗanda aka nazarta, da kuma duba littattafai da kundayen bincike da maƙalu da kuma tattaunawa da masana waƙoƙin baka na Hausa domin samun bayanan da suka zama fitila ga nazarin. Daga ƙarshe sakamakon bincike ya nuna cewa, Alhaji Musa Ɗanƙwairo yana amfani da tubalan yabon mata a wasu waƙoƙinsa.