Reagimi britanik ndaj interesimit të shtetit shqiptar për shqiptarët në Jugosllavi gjatë viteve 1919–1939

Një ndër prioritetet kryesore të politikës së jashtme britanike në periudhën midis dy luftërave botërore ishte ruajtja e paqes dhe e stabilitetit politik në Evropë, si domos në Ballkanin Juglindor, ku paqëndrueshmëria politike e Shqipërisë e gërshetuar nga ambiciet hegjemoniste të fqinjëve të saj do të mund të shndërroheshin në një konflikt të shkallës së gjerë, duke i përfshirë edhe shtetet tjera evropiane. Prandaj, në vazhdën e ndjekjes së një politike të ekuilibrit politik në Ballkan, Britania e Madhe i kushtoi një rëndësi të madhe Shqipërisë, sidomos në vitet e para të pasluftës. Konsujt britanikë të akredituar në Shqipëri me kujdes i vëzhgonin gjitha zhvillimet politike në vend, madje duke mos hezituar as të jepnin këshilla të nevojshme apo edhe të përfshiheshin direkt në fashitjen e krizave të brendshme politike në Shqipëri. Si rezultat i një kujdesi të tillë politik , diplomacia britanike i kushtoi një vëmendje edhe qëndrimit të shtetit shqiptar ndaj shqiptarëve në Jugosllavi. Prandaj, punimi “Reagimi britanik ndaj interesimit të shtetit shqiptar për shqiptarët në Jugosllavi gjatë viteve 1919-1939” pretendon të paraqesë qëndrimin e diplomacisë britanike në situata të caktuara politike, ku shteti shqiptar reagonte ndaj gjendjes së shqiptarëve në Jugosllavi, sikurse ishin masakrat e viteve 1919, roli i Komitetit “Mbrojtja Kombëtare e Kosovës” në zhvillimet politike në Shqipëri, zonën neutrale të Junikut, reagimet ndaj politikës shtypëse serbe dhe planeve për dëbimin e shqiptarëve etj.