“Gjurmime albanologjike – Folklor dhe etnologji” pesë dekada në shërbim të Albanologjisë dhe të shkencave albanologjike

Viti 2020 shënon përvjetorin e pesëdhjetë të një Projekti të rëndësishëm të komunikimit kulturor e shkencor gjithëshqiptar dhe më gjerë. Është ky një organ shkencor i Institutit Albanologjik, që mund ta trajtojmë si një revistë shumëdimensi onale, si një storie suksesi, si një trajtim problematikash të shumëllojshme, si arenë grumbullimi tepër të madhe të të dhënave të ndryshme identitare shkencore e kulturore, si përfshirje e periudhave kohore të historisë së kulturës, si një paraqitje enciklopedike, si pasuri e madhe informacionesh, që reflektojnë si realitete të pashmangshme nga revista „Gjurmime albanologjike - folklor dhe etnologji“. Po, tamam kështu, bile edhe më tepër. Revista shkencore Gjurmime albanologjike-folklor dhe etnologji (më tutje GJA-FE) është organi i Institutit Albanologjik të Prishtinës, i cili botohet pa ndërprerje tashe 49 vjet, përkatësisht që nga viti 1971, duke vazhduar edhe sot -viti 2020, kur do ta kemi në dorë numrin 50, që kurorëzon 50 vjet punë të frytshme, pozitive, kulturore, shkencore dhe profesionale. Revista GJA-FE i drejtohet publikut shkencor, por edhe auditorit të gjerë, të ciliti interesojnë fushat e albanologjisë dhe përgjithësisht shkencat humane. Revista është e hapur për mosha, profesione dhe profile të ndryshme shkencore e profesionale.