Ukiushi wa Kaida Tagusani katika Kusawiri Upotovu wa Maadili katika Jamii: Mifano kutoka Riwaya Teule za Ken Walibora

Hulka za wahusika katika tungo za sanaa aghalabu husukwa kutokana na matendo yanayoathiriwa na matukio katika mazingira wanamokulia. Hulka hizi hudhihirika kupitia matamko yanayobainisha mtagusano wa wahusika hao. Katika hali ya kawaida, matamko ya wahusika huongozwa, kuelekezwa na kudhibitiwa na uhalisia wa kaida tagusani yanayotokana na mazoea ya jamii husika katika miktadha maalum. Hivyo, kwa kuzingatia uyakinifu wa kaida hizi, kuna mipaka inayotarajiwa kudumishwa katika mtagusano wa wahusika mbalimbali. Hata hivyo, uhalisia wa kaida hizi unaonekana kukiukwa katika mtagusano wa wahusika wa umri na jinsia tofauti katika baadhi ya tungo za Ken Walibora. Mkabala wa makala hii ni kuwa ukiushi wa uhalisia huu umetumiwa kama njia ya kusawiri na kusuta upotovu wa maadili katika jamii. Utafiti huu ulioangikiwa nadharia ya Kitendo Neni cha Austin (1962) umejikita katika riwaya mbili za Ken Walibora: Siku Njema (1996) na Kidagaa Kimemwozea (2012). Riwaya hizi ziliteuliwa kimaksudi kutokana na uwezo wake wa kutoa data yakini zilizohitajika kutimiza mahitaji ya utafiti huu. Data za utafiti huu uliokitwa katika muundo elezi zilidondolewa na kunukuliwa kupitia usomaji wa kina wa riwaya husika kisha zikachanganuliwa kwa kupambanua yaliyomo. Matokeo ya utafiti huu yamewasilishwa kinathari. Pamedhihirika ukiushi wa kaida za kijinsia kuhusu maadili ya mapenzi, ukiushi wa kaida kuhusu maadili ya malezi, ukiushi wa kaida kuhusu maadili ya uaminifu na utu na ukiushi wa kaida katika mahusiano ya wanandoa kuhusu maadili ya ukweli.