Maoni ya wanafunzi wa taasisi za kiufundi za kitaifa kuhusu nafasi ya Kiswahili katika elimu ya ufundi nchini Kenya

Utafiti huu ulinuia kutafuta maoni ya wanafunzi wa taasisi za kiufundi za kitaifa kuhusu nafasi ya lugha ya Kiswahili katika elimu ya kiufundi. Muundo wa Uchunguzi Kimaelezo ulitumiwa, huku taasisi 5 za kiufundi za kitaifa na sampuli ya wanafunzi 148 na wakufunzi 20 wakishirikishwa katika utafiti. Aidha, utafiti huu ulitumia hojaji na mahojiano kukusanya data. Mbinu ya Yaliyomo Mchanganuo ilitumiwa kuchanganua data. Matokeo ya utafiti huu yalidhihirisha kuwa lugha ya Kiswahili huchukua nafasi kuu katika mtaala wa elimu ya ufundi katika taasisi za kiufundi za kitaifa nchini. Kwa sasa, Kiswahili sio lugha ya ufundishaji katika taasisi hizi, ila hutumiwa na wakufunzi wa kozi mbalimbali kudadavua dhana tata, hasa miongoni mwa wanafunzi wa astashahada. Pia, utafiti huu zaidi uligundua kuwa Kiswahili ni lugha ya mawasiliano kwa wanafunzi wengi. Kutokana na majukumu haya yaliyodokezwa na wasailiwa, utafiti unapendekeza kwa Wizara ya Elimu ya Juu, Sayanzi na Teknolojia (MOHEST), ikishirikiana Taasisi ya Ukuzaji Mitaala (KICD) kubuni mkakati wa kuanzisha ufundishaji wa lugha ya Kiswahili kama somo katika taasisi za ufundi nchini. Kwa kufanya hivyo, taasisi tajwa zitakuwa zikihimilisha dhima za kiakademia na kijamii ambazo hutekelezwa na Kiswahili katika mtaala wa elimu ya ufundi. Utafiti zaidi unaweza kulinganisha na kulinganua mielekeo ya wanafunzi wa taasisi za ufundi kuhusu Kiswahili na Kiingereza kama lugha ya kutoa mafunzo miongoni mwa wanafunzi wa astashahada.