Sitiari Dhanifu Katika Mazungumzo ya Hafla ya Mahari Katika Jamii ya Agikuyu

Utafiti huu ulizitathmini sitiari dhanifu ambazo huibuka katika mchakato ufungamanishwao na hafla za majadiliano ya mahari katika awamu mbalimbali za shughuli hiyo muhimu katika jamii ya Agikuyu inayorejelewa kama “Ruracio”. Matumizi ya sitiari katika kujenga majadiliano huwa uti wa mgongo na kwa sababu hiyo wawakilishi wanaoteuliwa na pande mbili za aila husika huhitajiwa kuwa na umilisi mpevu wa lugha husika ili kufaulisha shughuli hiyo. Ikumbukwe kuwa, sitiari zinazotumiwa katika mchakato husika huchangia kujenga ukuruba baina ya koo husika kwa mujibu wa mila na desturi za jamii ya Agikuyu popote pale inapojikuta. Data iliyokusanywa ilirekodiwa kutoka mazungumzo halisi ya hafla husika ambapo mtafiti alivihudhuria vikao vitano tofauti lengo likiwa kuipata data ambayo kwa mujibu wa utafiti ingesemwa kuwa tegemevu. Kama mshiriki, mtafiti alizihudhuria hafla mbili katika gatuzi la Muranga na tatu katika gatuzi la Nakuru anakokaa. Data ilitafsiriwa na kuainishwa kwa mujibu wa maratokezi na hatimaye kuelezewa. Sitiari nyingi zilizojitokeza zilifungamana na vitambulisho vya kijinsia. Aidha, sitiari hizo zikijikita katika matukio tofauti tofauti ya mchakato wote wa sherehe hiyo. Ilibainika kuwa, sitiari husheheni hafla hii kwa kiwango kikubwa zikichangia kuingiliana na kukamilisha awamu tofauti tofauti za mitagusano ya jamii hii ya Agikuyu. Matokeo ya utafiti huu bila shaka yatajenga dafina bora ya wasomi katika uwanja wa fasihi na uchanganuzi lugha