Jinsi Masuala ya Kijinsia Yalivyo Shughulikiwa Katika Tamthilia ya ‘Bembea ya Maisha’ kwa Kuzingatia Jinsia ya Mwandishi

Maumbile ya binadamu yamechukua mikondo miwili; mwanamume na mwanamke. Jamii tofauti hutoa majukumu kwa kuzingatia migao hii miwili. Hivi ni kusema kuwa, shughuli za mtu katika jamii nyingi za Kiafrika humfungamanisha na jinsia ya kiume au kike kama ilivyo katika tamthilia ya Bembea ya Maisha iliyoandikwa na Timothy Arege mwaka wa 2020. Malengo ya Makala haya ni kutathmini jinsi masuala haya ya kijinsia yalivyo shughulikiwa na mwandishi huyu katika tamthilia hii. Nadharia itakayotumiwa kuendeleza kazi hii ni nadharia ya Ufeministi wa Kiafrika iliyoasisiwa na Chioma (1980) na kuendelezwa na watafiti wengine kama Ogundipe (1994), Wamitila (2003), Nnaemeka (2003) miongoni mwa wengine. Nadharia hii inalenga kutoa mwelekeo wa jinsi ya kumnasua mwanamke katika nafasi finyu aliyopewa katika jamii na nyanja tofauti. Data iliyotumika kuendeleza utafiti huu ilitoka maktabani kwa kusoma makala, vitabu, majarida na mambo mengine katika mtandao yanayohusiana na mada hii. Data inayohusiana na jinsia ya wahusika ilitoka katika tamthilia ya Bembea ya Maisha.  Tamthilia ya Bembea ya Maisha iliteuliwa kimaksudi kwani mwandishi amewapa nafasi tosha wahusika wa jinsia ya kike na kiume. Wahusika hawa pia ni wa miaka tofauti kuanzia watoto hadi watu wazima. Mtafiti alisoma tamthilia husika na kuchambua wahusika kwa undani ili kupata data. Data iliyohitajika ilikusanywa na matokeo kuwasilishwa kwa njia ya maelezo na jedwali. Matokeo ya utafiti huu yalionyesha kuwa, licha ya juhudi nyingi zilizofanywa ili kumpa mwanamke nafasi katika jamii, bado kuna baadhi ya waandishi ambao wamempa nafasi finyu au ya chini katika kazi zao za fasihi. Usampulishaji dhamirifu ulitumika kuteua tamthilia ya Bembea ya Maisha. Data iliteuliwa kimakusudi. Mtafiti alizingatia nidhamu katika utafiti huu. Utafiti huu utakuwa wa manufaa kwa waandishi wa kazi za kifasihi ambao wanadhamiria kuandika kwani watajua namna ya kumsawiri mwanamke kama kiungo muhimu katika maendeleo ya jamii. Aidha, wasomi wa fasihi za Kiafrika watapa taswira ya nafasi za kila jinsia katika jamii za Kiafrika