Vlerësimi i shëndetit oral tek fëmijët dhe adoleshentët e rinj

Shëndeti oral tek fëmijët dhe adoleshentët dhe kujdesi ndaj tij është një sfidë me të cilën stomatologët përballen vazhdimisht në ditët e sotme. Patologjitë orale janë ndër sëmundjet jo të transmetueshme më të përhapura në të gjithë botën duke prekur rreth 3.5 miliardë njerëz, ku kariesi i patrajtuar i dhëmbëve të përhershëm është sëmundja orale më e shpeshtë. Shëndeti i dobët oral është përgjegjës për një varg problemesh që lidhen me praninë e dhimbjes në gojë, vështirësitë në përtypjen e ushqimeve, kequshqyerjen, çrregullimet psikologjike dhe emocionale të cilat mund të shkaktojnë tek individët pakënaqësi, irritim, mos-socializim, humbje të orëve të mësimit apo orëve të punës, etj. Identifikimi dhe informimi mbi faktorët të cilët ndikojnë në mbarëvajtjen e tij përbëjnë elementë të rëndësishëm në promovimin e tij dhe parandalimin e sëmundjeve dentare veçanërisht në kategoritë më vulnerabile.