پێشمەرگێ ئێکەتی نیشتمانی کوردستان ل بەهدینان ١٩٧٦-١٩٧٨ خواندنه‌كا مێژوویی

پوختە دەڤەرا بەهدینان دماوەیێ ١٩٧٦-١٩٧٨ ژ دەڤەرێن ستراتیجی دهێتە هژمارتن و دبیتە بربرا پشتا شورەشا کوردی ل وی دەمی و یێ کونترول ل سەر بەهدینان کربا ژ پارتا هەرە بهێز بوو،  ل سەردەمێ شورەشا ئیلونێ ١٩٦١-١٩٧٥ سنورێ ئیران-عیراق سنورەکێ گرنگ و ستراتیجی بوو ژبەرکو پتریا هاریکاریێن شورەشێ ژ ئیرانێ دهاتن، لێ د شورەشا گولانێ دا سنورێ ستراتیجی دبیتە سنورێن عیراق-تورکیا-سوریا ژبەرکو تورکیا ل وی دەمی سیاسەتا چاڤنقاندنێ بکارئینایە و هاریکاریێن شورەشێ بتایبەتی بۆ ئێکەتی نیشتیمانی کوردستان ژ سوریا دهاتن ئەڤ سنورە کو ب درێژاهیا وێ دەڤەرا بەهدینانە دبیتە جهێ ناکوکی و ململانیێ دناڤبەرا پارتێن پارتی و ئێکەتی ژبۆ هندێ بکەڤیتە بن کونترولا وان ، ژبەرهندێ ئێکەتی چەندین جارا هەولدان کرن مەفرەزەیێت پێشمەرگەیا فریکرنە بەهدینان لێ پارتی ریک لێ گرتن ژوان ل خزیرانا ١٩٧٦ مەفرەزەیا ئیبراهیم عەزۆ گەرگەری و ل دیڤدا هێرشەکا بەرفرەهـ ل خزیرانا ١٩٧٨ فریکرنە دەڤەرێ لێ هەردوو جاران ژلایێ پارتی رێک لێ هاتە گرتن. د ئەڤێ ڤەکولینێدا بەرسڤ لسەر ئەڤان پرسیاران هاتیە دان، ئایا ئێکەتی نیشتمانی کوردستان تا چ رادە شیا رێکخستنێن خو ل بەهدینان دروست بکەن؟ ئەگەرێن هاتنا پێشمەرگەیێن وان بۆ بەهدینان چ بوون؟ و پشتی هاتنا مەفرەزەیێن وان پەیوەندیێن ئێکەتی دگەل پارتی دکەڤنە چ دۆخ دا؟  ئەنجامێن هنارتنا وان مەفرەزەیا چ بوون؟