وێنێ ژنێ د کورتە چیرۆکێن نڤیسەرێن زەلامدا ل دەڤەرا بەهدینان

ژن وەکو ئەندامەکا گرنگا جڤاکی ب گەلەک ئەرکان رادبت و دیسان گەلەک پرس و ئێش و ئازار هەنە و نەخاسمە د جڤاکێن تێدا دەستهەلات یا زەلامی یا بندەستە و مافێن وێ خوارینە، گەلەک جاران بوویە بابەت و د ئەدەبیدا هاتیە وێنەکرن. د بیاڤێ کورتە چیرۆکێدا ل دەڤەرا مە دبت گەلەک چیرۆکنڤیسێن ژن نەبن دەربڕینێ ژ پرس و ئێش و ئازارێن وێ بکن، لەوما گەلەک جاران چیرۆکنڤیسێن زەلام بۆ مە ژن وێنەکرینە. ئەڤ ڤەکۆلینە هەوڵدانەکە بۆ پێشچاڤکرنا چەوانییا وێنەکرنا ژنێ و ئێش و ئازارێن وێ ژ ئالییێ چیرۆکنڤیسێن زەلامڤە. هەتا چەند شیاینە دەنگێ ژنێ بگەهینن؟ ئەرێ وێنەکرنەکا ژیوارییە؟ ئانکو وێنێ ئاسایی و کەهییێ ژنێیێ د جڤاکیدا پێشکێشدکت یان ژێ دویرکەتییە؟ ژن وەکو (یێ دی) وەکو هەڤڕک وێنەکریە یان نە؟ ژ ئەنجامێ ڤەکۆلینێ ل ڤان پرسان، دیاربوو د پترییا کورتە چیرۆکاندا ڤەگێڕان ب جهناڤێ کەسێ سییێ یێ نەدیارە، ئانکو هەر چەندە بابەت وێنەکرنا ژنێیە و ئەو بابەت و کەسایەتییا سەرەکییە، بەلێ چیرۆکنڤیس ب جهناڤێ من نائاخڤت و خوە نادەینت جهێ وێ. وێنێ ژنێ یێ ژ هەمیان پتر هاتیە پێشکێشکرن یێ ژنا بندەست و بێدەستهەلاتە، نەخاسمە یا دهێتە کوشتن. د پترییا کورتە چیرۆکاندا وێنێ کەهی و ئاساییێ ژنێ یێ جڤاکی بۆ دەستنیشانکری پێشکێشکریە. کێم جاران ژن وەکو هەڤڕکا زەلامێ هاتیە وێنەکرن.