Usawiri Wa Maradhi Sugu Yanayodhoofisha Mwili Katika Riwaya Teule Za Kiswahili

Maradhi ni mojawapo ya matatizo ya kimaumbile yaliyotaabisha binadamu duniani kote kwani asilimia kubwa ya maradhi hayo hayakujulikana vyanzo vyake licha ya utafiti wa kisayansi kuimarika duniani. Binadamu msomi na asiyesoma huishi na wasiwasi kila uchao kwani hajui litakaloathiri mwili wake kesho; hali ambayo hutoa taswira ya maisha kama jinamizi lisilotabirika. Utafiti uliofanywa na Shirika la Afya Duniani (2019) unaonyesha kuwa ongezeko la maradhi sugu duniani linatokana na vyakula na vinywaji anavyotumia binadamu vilivyojaa kemikali za kila aina ambazo hutumiwa na mwanadamu katika shughuli za kilimo hususan wakati wa upanzi, ukuzaji, uvunaji na pia uhifadhi wa nafaka. Vilevile, Shirika hili lilibainisha wazi kuwa ongezeko la maradhi husababishwa na mazingira chafu anamoishi mwanadamu na pia mtindo wa maisha katika jamii ya kisasa. Azma kuu ya utafiti ilikuwa kuchunguza usawiri wa maradhi sugu yanayodhoofisha mwili katika riwaya teule. Mtafiti alianuia kuchunguza jinsi mwili wa binadamu uliodhoofishwa na maradhi sugu unavyosawiriwa katika riwaya teule za Kiswahili. Malengo mahususi yalikuwa; kudadavua kiini cha ongezeko la maradhi sugu yadhoofishayo mwili wa binadamu kwa mujibu wa riwaya teule, kutathmini athari za maradhi hayo sugu na kisha kuchanganua juhudi za wanajamii kukabiliana na maradhi sugu zinavyosawiriwa katika riwaya teule. Utafiti huu uliongozwa na Nadharia ya Udhanaishi. Nadharia hii inatilia mkazo kuwa juhudi za mwanadamu kupambana na maisha huishia katika kukata tamaa pamoja na. Mtafiti aliteua sampuli ya kimaksudi iliyojumuisha riwaya mbili ambazo ni: Kala Tufaha ya Omar Babu na Safari ya Lamu ya John Habwe zilizoandikwa katika karne ya ishirini na moja. Mtafiti alitumia mbinu ya utafiti wa maktaba kudurusu maandishi mbalimbali yaliyoandikwa kuhusu mada ya utafiti. Mtafiti alitumia mbinu za kimaelezo ili kuchambua na kuwasilisha data yake akiongozwa na mihimili ya nadharia ya Udhanaishi. Matokeo ya utafiti huu yatachangia pakubwa katika kuhamasisha jamii kuhusu maradhi sugu yanayodhoofisha mwili