Etnomuzikologia daneze Birthe Traerup dhe hulumtimet e saj në Kosovë: një letërkëmbim profesional e miqësor me Anton Çettën

Birthe Traerup (1930 – 2022) ishte etnomuzikologe daneze që ka dhënë një kontribut të jashtëzakonshëm për studimin dhe dokumentimin e folklorit dhe muzikës tradicionale në Kosovë, në vitet ’60 -’70 të shekullit të kaluar. Gjatë viteve të kërkimit të saj, ka mbledhur dhe analizuar materiale të pasura muzikore që reflektojnë diversitetin dhe thellësinë e trashëgimisë kulturore të Kosovës, te komuniteti goran dhe ai shqiptar, në Malësinë e Prizrenit, Has e Drenicë. Traerup është veçanërisht e njohur për studimet e saj mbi muzikën vokale dhe instrumentale, si dhe për ndikimin që ka pasur kultura popullore kosovare në lidhje me traditat muzikore të rajonit të Ballkanit. Ajo ka realizuar disa projekte të rëndësishme, duke përfshirë regjistrimin dhe ruajtjen e këngëve tradicionale, këngëve të dasmave, si dhe muzikës për festa dhe ceremoni, duke përdorur metoda etnomuzikologjike që integronin mbledhjen e të dhënave në terren dhe analizën teorike. Nga hulumtimet edhe me kolegë gjermanë e skandinavë, ajo ka arritur të sigurojë një arkiv të pasur me shumë videoincizime, audio e dorëshkrime, të cilat sot gjenden në arkivin danez të muzikës. Pjesë e trashëgimisë që na ka lënë është edhe letërkëmbimi me prof. Anton Çettën, i cili është bërë pjesë e këtij punimi.