Epekto ng Pagbabago ng ekonomiya sa pamilya at komunidad: Pagsusuri sa mga hamon at oportunidad batay sa pananaw ng mga guro at ulong guro sa Ika-5 Distrito ng Isabela

Sa nakalipas na mga taon, ang Pilipinas ay nakaranas ng malalaking pagbabagong pangekonomiya na may malalim na epekto sa pamilya, komunidad, at sektor ng edukasyon. Gayunpaman, nananatiling limitado ang mga pag-aaral na nakatuon sa perspektibo ng mga guro at ulong guro, lalo na sa mga rural na lugar. Layunin ng pag-aaral na ito na suriin ang epekto, hamon, at oportunidad ng pagbabago ng ekonomiya batay sa karanasan ng 95 respondente mula sa Ika-5 Distrito ng Isabela gamit ang deskriptibo-korelasyonal na disenyo. Ipinakita ng resulta na mataas ang antas ng kaalaman ng mga kalahok ngunit nananatiling napakalubha ang mga hamon, kabilang ang kakulangan sa pondo at mga suliraning nakaaapekto sa pagkatuto ng mga mag-aaral. Sa kabila nito, kinilala rin ang mga oportunidad at epektibong coping strategies na maaaring makatulong sa pag-angkop sa mga pagbabagong ito. Gayunpaman, ipinakita na walang makabuluhang ugnayan sa pagitan ng kaalaman at mga hamon. Sa kabuuan, ipinahihiwatig ng pag-aaral na bagama’t mataas ang kaalaman ng mga guro at ulong guro, hindi ito sapat upang mabawasan ang mga hamong dulot ng pagbabago ng ekonomiya.