Kahusayan sa pagsusuri ng nobela ni Dr. Jose P. Rizal: Batayan sa pag-angat ng pagbasa ng akda

Tanging layunin ng pananaliksik na ito na matukoy ang antas ng kahusayan ng mga mag-aaral sa pagsusuri ng nobela ni Dr. Jose Rizal, partikular ang El Filibusterismo, gayundin ang mga hamon at karanasang kanilang kinaharap sa pagbasa at pagsusuri ng akda. Ang mga tagatugon sa pag-aaral ay binubuo ng siyamnapu’t apat (94) na mag-aaral sa ikasampung baitang. Isinagawa ang pananaliksik gamit ang pinagsamang metodolohiyang kwalitatibo at kwantitatibo. Sa kwalitatibong bahagi, ginamit ang panayam upang matukoy ang mga hamon at karanasan ng mga mag-aaral, samantalang sa kwantitatibong bahagi ay ginamit ang talatanungan upang masukat ang kanilang kahusayan sa pagsusuri ng nobela. Natuklasan sa pag-aaral na ito na di-gaano ang kahusayan ng mga mag-aaral sa pagsusuri ng nobela, partikular sa mga aspekto ng talasalitaan, tauhan, tagpuan, at mga pangyayari. Napatunayan ding ang walang bisang pala-palagay ay di- tanggap sapagkat may makabuluhang pagkakaiba ang antas ng pagsusuri ng nobela ayon sa katangian ng mga tagatugon. Kabilang sa mga pangunahing hamon na kinaharap ng mga mag-aaral ay ang kawalan ng interes sa asignaturang Filipino, kahinaan sa pag-unawa sa binasang akda, kakulangan sa suporta ng magulang, at dami ng gawaing-bahay na nagiging hadlang sa oras ng pag-aaral. Bilang mungkahi, nararapat na magpatupad ang mga guro ng iba’t ibang estratehiya at teknik sa pagtuturo upang higit na mahikayat ang mga mag-aaral na aktibong makibahagi sa pagbasa at pagsusuri ng mga akdang pampanitikan.