:ڕه‌خنه‌ی وه‌رگێڕان و كێشه‌ی زاراوه‌

ئه‌م توێژینه‌وه‌یه‌،توێژینه‌وه‌یه‌كی چۆنایه‌تییه‌، له‌ ڕێگه‌ی شیكاری ڕه‌خنه‌یییه‌وه‌، به‌راوردی له‌ نێوان چه‌مك و فۆرم و پێناسه‌ی‌ زاراوه‌كان له‌ سه‌رچاوه‌ بنه‌ڕه‌تیه‌كانیان له‌گه‌ڵ چۆنیه‌تی سازكردن و داڕشتن و وه‌رگێڕان و ناساندنیان له‌ نێو فه‌رهه‌نگه‌كانی ڕه‌خنه‌ی ئه‌ده‌بی كوردیدا ده‌كات. ئه‌مه‌ش به‌ ئامانجی دۆزینه‌وه‌ی جۆر و ژێده‌ری ئه‌م كێشانه‌ی كه‌ له‌ فه‌رهه‌نگسازی ڕه‌خنه‌ی ئه‌ده‌بی كوردیدا هه‌ن. فه‌رهه‌نگه‌كانیش: "فه‌رهه‌نگی زاراوه‌ی ئه‌ده‌بی"  و " فه‌رهه‌نگی شیكارانه‌ی زاراوه‌ی ئه‌ده‌بی" له‌ ئاماده‌كردنی به‌ختیار سه‌جادی و محه‌مه‌د مه‌حموودی،  "زاراوه‌ی ئه‌ده‌بی" له‌ ئاماده‌كردنی لیژنه‌ی ئه‌ده‌ب له‌ كۆڕی زانیاری كوردستان"، " فه‌رهه‌نگی زاراوه‌ی ئه‌ده‌بی و ڕه‌خنه‌یی" ی نه‌وزاد ئه‌حمه‌د ئه‌سوه‌د، "فه‌رهه‌نگی ئه‌ده‌بی" ی موحسین ئه‌حمه‌د عومه‌ر، "فه‌رهه‌نگی زاراوه‌ی ڕه‌خنه‌یی" ی به‌ختیار سه‌جادی، " كلیلدان: فه‌رهه‌نگی ئه‌ده‌ب و ڕه‌خنه‌" ی عه‌بدوڵا تاهیر به‌رزنجی و عه‌لی تاهیر به‌رزنجی،. ئه‌مه‌ هه‌وڵێكی بنكۆڵكارییه  به‌ سوود وه‌رگرتن له‌  ڕه‌خنه‌ی وه‌رگێڕان و زاروه‌ناسی، ئامانجی ساغكردنه‌وه‌ و ده‌ستنیشانكردنی جۆری كێشه‌ و هۆكار و چۆنیه‌تی چاره‌سه‌ركردنی ئه‌و ناته‌بایی و ناڕوونه‌ییه‌ی كه‌ له‌ پرۆسه‌ی چۆنیه‌تی وه‌رگێڕان و  داڕشتن و سازكردن و پرسی بابه‌تیبوون له‌ داڕشتنی مانا و چه‌مكی هه‌ندێك له‌و زارا‌وه‌ ڕه‌خنه‌ییانه‌ی كه‌ له‌ نێو فه‌رهه‌نگه‌كاندا هه‌ن. گرنگترین ئه‌و كێشانه‌ش پۆلینكراون، نموونه‌كان به‌ گوێره‌ی جۆر كێشه‌كان بژار كراوون، كه‌ په‌یوه‌ندییان به‌ فۆرم و مانای زاراوه‌كانه‌وه‌ هه‌یه‌، كه‌ سێ كێشه‌ی سه‌ره‌كیی سازكردن و چه‌مك و ناساندنن.