نارسيسييزم و داهێنانى شيعر لا‌ى شاعيرانى كلاسيكى كورديى كرمانجى ناوه‌ڕاست” نالى” و ”سالم” به‌نموونه‌

پوخته ئاشكرايه‌ له‌ ئه‌ده‌بى كورديدا قۆناغى شيعرى كلاسيكى كوردى هاوكوفى ئه‌ده‌بى زۆربه‌ى ميلله‌تانى دنيا پێگه‌يه‌كى گرنگ و پڕ بايه‌خى هه‌يه‌، له‌م نێوه‌نده‌دا شيعرى كلاسيكى كورديى كرمانجى ناوه‌ڕاست كه‌ له‌ لايه‌ن ”نالى“ يه‌وه داده‌مه‌زرێت، دواتر شاعيرانى وه‌ك “سالم و كوردى و مه‌حوى“‌ و چه‌ندين شاعيرى تر گرنگيى و بايه‌خى پێدراوه‌، دياره‌ هه‌ستى شانازيى به‌ خۆكردن و شانازيى به‌ ”نه‌ته‌وه‌، به‌رهه‌مى شيعريى، خێڵ و عه‌شيره‌ت، زمان، كولتوور، زێد، نيشتيمان” له‌ نێو شيعرى كلاسيكى كورديدا زۆر به‌ زه‌قى دياره‌ و شاعيرانى كورد به‌ ئاشكرا ئه‌م هه‌سته‌ى خۆيان ده‌رده‌بڕن‌، ئەم لێكۆڵینه‌وه‌یە له‌ژێر ناونیشانی (نارسيسييزم و داهێنانى شيعر لا‌ى شاعيرانى كلاسيكى كورديى كرمانجى ناوه‌ڕاست” نالى” و ”سالم” به‌نموونه‌) دایه‌. كە له‌ پێشه‌كی و دوو بەش پێكدێت. بەشی یه‌كه‌میان تیۆرییه‌، چوار ئه‌م باسانه‌ لەخۆ دەگرێت: ئه‌فسانه‌ى نارسيسييزم. چەمك و زاراوه و ‌پێناسه‌ی نارسيسييزم. تايبه‌تمه‌ندييه‌كانى نارسيست. تێكچوونى كه‌سايه‌تيى مرۆڤى نارسيست. ناسنامه‌ى مرۆڤى نارسيست له‌ ڕوانگه‌ى ده‌‌روونناسيه‌وه‌. پەیوەنديی نێوان نارسيسییزم و ئایين ئەوەی پەیوەستیش بێت بە بەشی دووه‌مەوە سەرلەبەری پڕاكتیكییە:‌ بریتيیه‌ له‌ پڕاكتیزه‌كردنی نارسيسييزم له‌ شيعرى شاعیرانی كلاسیكی كورديی كرمانجى ناوه‌ڕاست. دواتر ئەنجامەکان لە چەند خاڵێکدا خراونەتەڕوو، سه‌رچاوه‌كانیش به‌شێوه‌یه‌كی زانستییانه‌ ڕیز و پۆڵێنکراون. لە کۆتاییدا پوختەی توێژینەوەکە بۆ زمانی عەرەبی و ئینگلیزی وەرگێڕدراون.