Vepra letrare e Helena Kadaresë

Helena Kadare është një nga zërat më të veçantë të letërsisë së shkruar nga gratë, që nga vitet e ’60-ta. Në harkun e disa dekadave, Kadare ka kontribuar ndjeshëm në portretizimin letrar të gruas, për botëkuptimin e saj, ecjen e saj në jetë, por edhe për pengesat që hasë e kapërcen. Vepra letrare e Helena Kadaresë dallohet për nga kthjelltësia e mendimit e sensibiliteti i hollë i ndjenjave. Preokupim i saj krijues është thurja artistike e dridhjeve të imta shpirtërore të gruas. Në romanet e shkruara deri më 1990, protagonistet si Vera te “Shuaje dritën Vera”, Bardha te “Një lindje e vështirë” dhe Shpresa te “Bashkëshortët” qëndrojnë larg idealizimit konvencional të kohës. Ato konceptohen e krijohen si figura autentike dhe kjo ndodh sepse arrihet ngjizja midis figurës dhe idesë, prandaj ato vijnë të natyrshme dhe pa artifice. Helena Kadare nuk e sheh gruan si personazh në kundërvënie me burrin, por e percepton atë në esencë superiore – më të aftë se burrin në përballje me jetën e përditshme. Këto personazhe tejkalojnë paradigmat konvencionale, dhe mbesin modele frymëzuese.