BOKSDA DÖYÜŞ ÜSLUBLARININ MÜQAYİSƏLİ TƏHLİLİ

Boks idman növü uzun inkişaf yolu keçmiş və indiki yüksək səviyyəli texniki-taktiki halına gəlib çatmışdır. Bu inkişafın nəticəsində taktiki olaraq, müxtəlif döyüş üslubları yaranmışdır. Yəni, boksçular qalib gəlmək üçün müxtəlif rəqiblərə qarşı müxtəlif taktiki üslüblardan istifadə edirlər. Boks idman növü ilə məşğul olmağa başlayan andan, yeniyetmələr və ya gənclər illər keçdikcə onların antropometrik göstəriciləri, fiziki, texniki, taktiki, psixoloji, iradi keyfiyyətləri, intellektual, nəzəri bilikləri getdikcə artır və inkişaf edir. Onlar müxtəlif miqyaslı yarışlarda müxtəlif rəqiblərlə döyüşərək öz ustalıqlarını getdikcə artırırlar. Həmin bu sadaladığımız keyfiyyətlər inkişaf etdikcə, idman ustalıqları artdıqca boksçuların özünə məxsus döyüş tərzləri, döyüş üslubları əmələ gəlir. Biz bu üslublar haqqında məlumat verəcəyik və həmçinin, hansı üslubun daha effektiv olmasını təhlil edəcəyik. Müxtəlif boks məktəbləri bu üslubları fərqli formada adlandırmış, bəzən isə heç təsnif etməmişlər. Qərb boks məktəbi (Amerika, İngiltərə) bu üslubları ingilis terminləri ilə adlandırmışlar. Sovet boks məktəbi isə bu üslubları fərqli formada təstifatlaşdırıblar. Biz bu üslubları ümumiləşdirib terminlərə aydınlıq gətirmiş və oxucunun anlaması üçün şərti olaraq diaqramlarla izahat vermişik.