Hüseyn Cavid əsərlərinin nəşr təkrarlığı üzrə növləri və onların müqayisəli təhlili (stereotip, təkrar, düzəldilmiş, yenilənmiş və s. nəşrlər əsasında)

Azərbaycanın görkəmli şairi Hüseyn Cavidin yaradıcılığına və şəxsiyyətinə münasibət birmənalı olmamışdır. Şairin yaşadığı dövrün ictimai-siyasi vəziyyəti, onun ağır nəticələri bir çox ziyalı kimi Hüseyn Cavidin də üzərinə kölgə salmışdı. Şairin əsərləri uzun müddət qadağan olunmuş ədəbiyyat siyahısına daxil edilərək çapına izin verilməmiş, mövcud kitabları isə mağaza və kitabxana dövriyyəsindən çıxarılmışdı. Bu səbəbdən onun yaradıcılığının tədqiqi mərhələli şəkildə aparılmalı və hər dövrün mövcud kontekstindən çıxış edərək obyektiv təhlil edilməlidir. Təqdim etdiyimiz məqalədə mütəfəkkir şair Hüseyn Cavidin siyasi bəraətindən sonra 1957–1980-ci illər ərzində Azərbaycan dilində çap olunmuş əsərlərinin nəşr tarixini və redaktə xüsusiyyətlərini nəzərdən keçirəcəyik.