گه‌ره‌نتییه‌ نێوده‌وڵه‌تییه‌كانی پاراستنی مافه‌ سیاسییه‌كان

ئه‌و بابه‌ته‌ی كه‌ له‌و تویژێنه‌وه‌دا لێكۆڵینه‌وه‌مان سه‌ر كردووه‌ بریتیه‌ له‌ گه‌ره‌نتییه‌ نێوده‌وڵه‌تییه‌كانی پاراستنی مافه‌ سیاسییه‌كان كه‌ میتودی شێكاری و به‌راوردكاریمان به‌كار هێناوه‌، یاسای نێوده‌وڵه‌تی گشتی پاراستنی یاسایی بۆ مافه‌ سیاسییه‌كان له‌ چوارچێوه‌ی ڕێكه‌وتننامه‌كانی نێوده‌وڵه‌تی دابین كردووه‌. هه‌روه‌ها ڕێكخراوه‌كانی نێوده‌وڵه‌تی و هه‌رێمی به‌ تایبه‌تی ڕێكخراوی نه‌ته‌وه‌ یه‌كگرتووه‌كان ڕۆڵێكی سه‌ره‌كیان له‌ پاراستنی مافه‌ سیاسییه‌كانیان هه‌یه‌. له‌ سه‌ر ئاستی هه‌رێمی بۆ پاراستنی مافه‌ سیاسییه‌كان له‌ چوارچێوه‌ی یه‌كتیی ئه‌وروپا، یه‌كتیی ئه‌مریكا و ئه‌فرقیا، دادگای تایبه‌ت و په‌یوه‌ندیدار به‌ مافه‌كانی مرۆڤ دامه‌زراون، جگه‌ له‌وه‌ لیژنه‌ی تایبه‌ت به‌ مافه‌كانی مرۆڤ له‌ سه‌ر ئاستی هه‌رێمی بوونیان هه‌یه‌.هه‌رچه‌نده‌ مافه‌ سیاسییه‌كان ڕێكخستنی یاسایی له‌ چوارچێوه‌ی یاسای نێوده‌وڵه‌تی و ده‌ستوری بۆیان كراوه‌، به‌لام به‌ هۆی لاوازی په‌یڕه‌و كردنی سیسته‌می دیموكراسی و زال بوونی به‌رژه‌وندییه‌كانی سیاسی ولاتانی زلهێز له‌ سه‌ر یاسای نێوده‌وڵه‌تی ناتوانرێت به‌ كرداری كار بۆ پاراستنی مافه‌ سیاسییه‌كان بكرێت. بۆیه‌ پێویسته‌ دادگایه‌كی نێوده‌وڵه‌تی گشتی كه‌ سه‌ر به‌ ڕێكخراوی نه‌ته‌وه‌ یه‌كگرتووه‌كان بێت دابمه‌زرێت و ئه‌و دادگایه‌ لیژنه‌ی تایبه‌ت به‌ مافه‌كانی سیاسی هه‌بێت. هه‌روه‌ها پێویسته‌ چوارچێوه‌ی ده‌ستیوه‌ردانی مرۆیی فه‌راوانتر بكرێت و پاراستنی مافه‌ سیاسییه‌كانیش یه‌كێك بێت له‌و هوكارانه‌ی كه‌ پێویستی به‌ ده‌ستیوه‌ردانی نێوده‌وڵه‌تی هه‌بێت.