Vendosja e administratës shqiptare në Kosovën e liruar

Në përgjithësi, Ballkani kishte një pozitë shumë të volitshme gjeostrategjike për çdo pushtues. Kjo ishte edhe arsyeja se pse u sulmua Shqipëria në prill 1939, pastaj Greqia në tetor 1940 si dhe Jugosllavia në prill të vitit 1941. Në terma strategjikë, ekonomikë por edhe ushtarakë, Kosova ka qenë çdoherë një vend tërheqës për pushtuesit. Interesimi për territorin dhe pushtimin e Kosovës nga shtetet fashiste ishte shfaqur qysh në periudhën midis dy luftërave botërore. Këto shtete në rend të parë kishin si qëllim shfrytëzimin e pasurive natyrore të Kosovës. Ky fakt argumentohet shumë qartë me depërtimin e kapitalit gjerman në Kosovë për hulumtimin e pasurive dhe xeheve si dhe më vonë shfrytëzimin e tyre. Shteti gjerman kryesisht interesohej për shfrytëzimin e plumbit e të zinkut në Trepçë. Gjermania si një shtet që ishte në përgatitje e sipër për një luftë të gjerë botërore, kishte nevojë për lëndë të parë për armatimin e ushtrisë. Ajo deri në momentin e fillimit të luftës këtë lëndë e siguronte nga Britania e Madhe, mirëpo me tensionimin e gjendjes me Anglinë ajo i drejtoi planet nga Ballkani ku si synim të parë kishte Kosovën. Mirëpo, kapitali i Trepçës gjatë kësaj kohë ishte në duart e Britanisë së Madhe. Kjo ishte edhe arsyeja që Gjermania priste rastin e volitshëm për pushtimin e Trepçës.