کاریگەرییا بنەما و تایبەتمەندیێن ڕەخنا تێماتیکی بۆ دەستنیشانکرنا تێمان د کورتەچیڕۆکێن (ئیسماعیل هاجانی)دا

  ڕەخنا تێماتیکی وەک ئێک ژ ڕێبازێن ڕەخنا نوی هەوڵددەت ب ڕێکا ب کارهینانا کلیلێن ل بەردەست بگەهیتە واتایا ڕاستەقینە یا دەقی، ئێک ژ ساخلەتێن ئەڤێ ڕخنەیێ زنجیرەکا ئەزموونان بۆ یەکەیەکا دیارکری د کارێ ئەدەبیدا دادڕێژیت و ل دویڤ ئەوان دیتنان، بابەت بۆ تیورەکا ب ڕێکوپێک ژ هزرێن چڕ دهێتە گوهورین، ژبەر هندێ تیۆرا ڕەخنا تێماتیکی گرێدای سەرهلدانا بابەتەکیە یێ کو ب شێوەیەکێ دیار د دەقیدا ڕەنگڤەدانا خۆ هەبیت، بۆ ئەڤێ مەبەستێ بوچوونا ئامارەیی و دوبارەبوونا بابەتان دکەتە بناغە و داکوکیێ ل سەر دوبارەبوونا بەردەوام یا هزرەکا زاڵ دکەت.    خالا گرنگ د ئەڤێرێدا ئەوە کو ئایە ئەم دێ شێین دیڤچوونا ئەوان خالان کەین یێن کو کارێ ئەدەبی پێک دهینن و ئایە دێ شێین ژ پێخەمەت گەهشتن ب واتایا کویر و مەبەستا کارێ ئەدەبی چاڤدێریا ئەوان گوڕانکاریان کەین، ئانکو ڤەدیتنا کود و پەیڤێن سەرەکی، یانژی ڕەخنا تێماتیکی د شێت ڤەکۆلینا بابەتێ (تێم)ی هەڤشێوەی ڤەکۆلینێن دەقی بکەت.    ڕەخنەگرێن فرەنسی پەیڤا تێماتیک بۆ هەر ڤەکۆلینەکێ ئەوا کو تورا هزرێن ب فشار د تێکستێن نڤیسەریدا تاقیدکەن، یانژی بۆ وێ هزرا زاڵ د نڤیسینێدا ب کاردهینن، ئانکو تێماتیکی واتە وەسفکرنا ڕەگەزێن کاریگەرە ب شێوەیەکی کو ل گەل جیهانا ڕاستەقینە و خەیالیدا بگونجیت، خواندنا تێماتیکی کاردکەت بۆ مەبەستا تێگەهشتن و زانینا سەرچاوێ داهێنانێ و مەبەستێن دەقی و دەرهینانا هزرا سەرەکی و پەیاما زاڵ ئەوا د ناڤ بەرهەمێ ئەدەبیدا هەی.