Roli institucional në mbrojtjen e gjuhës së vlerave fetare

Gjuha dhe vlerat fetare janë në një lidhje aq të ngushtë, saqë është e vështirë të ndahen nga njëra-tjetra. Gjuha ndërton një tërësi te njeriu, që nuk mund të ndahet në tërësi të brendshme dhe në tërësi të jashtme. Gjuha fetare ka rëndësi të posaçme, sepse konsiderohet udhërrëfyes i rëndësishëm për njeriun dhe sjelljet e tij. Kur shqyrtohet çështja e gjuhës dhe e fesë, vërejmë qartë se funksioni i njeriut në shoqëri është më i plotë dhe më pozitiv. Individi nuk mund të luajë rolin që mund ta luajë institucioni, sepse njeriu, si individ, mundësitë e kontributit i ka të kufizuara në kohë dhe në vend. Institucioni organizon jetën e individëve dhe jo e kundërta. Kur bisedohet për rëndësinë e institucionit arsimor në shoqëri, konkretisht për rëndësinë institucionale në mbrojtjen e vlerave fetare, nuk mund të anashkalojmë rolin që ai luan në tërësi dhe përgjegjësinë që e ka në sfera të ndryshme. Mbrojtja institucionale e vlerave fetare frymëzon gjenerata të tëra dhe synimin e saj kryesor ka bartjen e gjuhës së vlerave fetare brez pas brezi. Jemi dëshmitarë të gjallë se roli institucional vazhdoi, vazhdon dhe do të vazhdojë në kryerjen e këtij misioni fetar, edukativ, arsimor dhe shoqëror, si dhe do të përballojë të gjitha sfidat, ngase bartësit e kësaj përgjegjësie janë të pajisur me amanetin hyjnor.