XIX əsrdə Azərbaycanda təhsil problemlərinin tədqiqi tarixi

Ölkəmiz müstəqil və suveren dövlət kimi yaşayır və həyatın bütün istiqamətlərində yeniləşmə və tərəqqi özünü göstərir. Xalqımız milli və mənəvi dəyərlərinə sahib çıxaraq zamanın tələbindən irəli gələn islahatlar həyata keçirir. Bunların içərisində təhsil islahatları önəmli yer tutur. Bu islahatlar ölkədə təhsilin düzgün və yüksək səviyyədə təşkili üçün vacib olanları əhatə edir. Yetişən nəslin hərtərəfli inkişafı üçün zəruri olan məsələlər islahat proqramında öz əksini tapmışdır. Təhsil müəssisələrində islahatların həyata keçirilməsi üçün səmərəli işlər görülür. Pedaqogika elmi isə ümumiləşmələr apararaq pedaqoji heyəti nəzəri cəhətdən silahlandırır. Bu prosesdə keçmiş irsdən məqsədyönlü istifadəyə, onun effektiv cəhətlərini qoruyub saxlamağa və yaradıcılıqla faydalanmağa xüsusi diqqət yetirilir. Professor F.Rüstəmovun qeyd etdiyi kimi “Keçmiş bu günlə bağlı olduğu kimi, gələcəklə də sıx əlaqədardır. Bu gün dünənin, sabah isə bu günün bətnindən doğduğuna görə, bu gündə dünənin, sabahda isə bu günün izləri olur. Bir çox məsələlərdə gələcək üçün zəmin təşkil edən bu günün ağıllı, qabaqcıl fikirləri keçmişin mütərəqqi işi ilə sıx əlaqədardır. Vətən və dünya mədəniyyətinin bütün mütərəqqi ənənələrindən novatorcasına faydalanmaq nöqteyi-nəzərdən seçdiyimiz mövzu aktualdır. Bu məsələlər müasir dövrdə yalnız nəzəriyyə, təlim və tərbiyə təcrübəsinin tədqiqi ilə məhdudlaşmır. Eyni zamanda keçmişin pedaqoji irsini və vaxtilə fəaliyyət göstərən qabaqcıl maarifpərvərlərin, ziyalıların pedaqoji fikrinə düzgün münasibət bəsləməklə, səmərəli elmi-pedaqoji problemlərin dərindən və populyar şəkildə tədqiq edilməsini də əhatə edir.