लँय् लूम्ह उपन्यासय् लैङ्गिक सीमान्त

Title: लँय् लूम्ह उपन्यासय् लैङ्गिक सीमान्त

Description:

‘लँय् लूम्हʼ उपन्यास मय्‌जु शशिकला मानन्धरया निगूगु उपन्यास खः । शशिकला नेवाः समाजय् मिसातसें फय्‌माःगु समस्या, व्यथायात आख्यान रूप बीम्ह उपन्यासकार खः । वय्‌कःया उपन्यासय् मिसात प्रतिकार याइपिं, हिगाःपिं, हिक्वाःपिं पात्रकथं न्हेब्वइ । थ्व उपन्यासय् नेवाः मिसातय्‌त मिजंतसें याइगु लैङ्गिक उत्पीडन व शोषण, छम्हमिसां मेम्ह मिसायात बीगु मानसिक यातना व पीडा, मिसातसें मिसायात स्वैगु बांमलाःगु मिखाया चित्रण दु । थ्व च्वसु ‘लँय् लूम्हʼ उपन्यासया लैङ्गिक सीमान्तीकृत समुदायया अध्ययनय् केन्द्रित दु । थुकथं हे सीमान्तीकृत मिसायात प्रभुत्वशाली वर्ग मिजंतसें मिसातय्‌त स्वैगु व याइगु बांमलाःगु दृष्टिकोण व व्यवहारया अध्ययन नापनापं सीमान्तीकृत वर्ग वा समुदायया सःयात नं न्हेब्वयागु दु । थौंया सीमान्तीकृत मिसायाके प्रतिरोधी चेतनाया विकास जुइधुंकूगु दु । थुज्वःगु प्रतिरोधया चेतना गुकथं उमिके विकास जुयावःगु दु धैगु बारे नं मालेगु ज्या थुकी जूगु दु । थथे मालेत सबाल्टर्न सिद्धान्तया मान्यतायात मू आधार यानाः पीडित जुयाच्वंपिं मिसातसें थःगु वर्गप्रति जुयाच्वंगु शारीरिक व मानसिक उत्पीडनया विरूद्ध थौंकन्हय्‌ विकसित जुयाच्वंगु प्रतिरोधीचेतनायात न्हेब्वयातःगु दु ।.