Murguía e “a demostración histórica” de Galicia

Con ocasión do primeiro centenario do nacemento de Murguía en 1933, a revista NOS adicoulle unhas páxinas especiais e o seu director, Vicente Risco, escribiu un longo ensaio interpretativo sobre a figura do patriarca, logo publicado na revista Arquivos do Seminario de Estudos Galegos. En ambos casos, sublíñase como achegas decisivas de Murguía a “demostración étnica” e a “demostración histórica”. Deste último trazo é do que me quero ocupar nesta sesión, pois da primeira xa o fixo o profesor Ramón Máiz ao analizar o paradigma do celtismo como núcleo esencial do seu pensamento. E tampouco me ocuparei do liderado político do rexionalismo galego, que fará Justo Beramendi. A miña intervención céntrase, pois, na formación de Murguía como historiador e na avaliación da sua obra historiográfica como expresión desa “demostración histórica” de Galicia, da que falaba Risco.