Rosalía de Castro e Murguía nas relacións transatlánticas

O proceso material da produción intelectual de Manuel Murguía crúzase de múltiples maneiras co da obra de Rosalía de Castro. O obxectivo deste artigo é mostrar como o traballo de ambos establece tamén redes de dependencia en relación coas comunidades de emigrantes galegos en América, especialmente en Cuba e Arxentina. Trátase de mostrar os camiños de interdependencia que cruzan o Atlántico e configuran, non só o mundo colonial, senón tamén a produción cultural e a acción política e institucional de Galicia. No caso concreto de Manuel Murguía e Rosalía de Castro esas relacións aparecen como decisivas tanto no proceso de produción coma de recepción e canonización da súa obra.