CONTEXT CLUES: SAY IT, TEACH IT, PRACTICE IT PAGPAPAUNLAD SA KAKAYAHAN NG MAG-AARAL SA PAGGAMIT NG PANLAPI SA SALITANG-UGAT SA IKA-7 BAITANG

Ang pananaliksik na ito ay tumutukoy sa paggamit ng Context Clues: “Say It, Teach It, Practice It” bilang interbensyon upang mapahusay ang kasanayan ng mga mag-aaral sa ika-7 baitang ng Baltazar Nicor Valenzuela National High School, Capungagan, Kapalong, Davao del Norte sa paggamit ng panlapi sa salitang-ugat. Napag-alamang may kakulangan ang mga mag-aaral sa wastong paggamit ng mga panlapi na nagiging hadlang sa tamang pagbubuo ng pangungusap at pagpapahayag ng ideya. Isinagawa ang interbensyon upang matugunan ang suliraning ito sa pamamagitan ng makabuluhang estratehiyang pampagtuturo. Gumamit ang pananaliksik ng mga estadistikang kasangkot sa pagsusuri ng datos gaya ng mean, standard deviation, paired samples t-test, at Cohen’s d. Lumabas sa pagsusuri na may makabuluhang pagtaas sa mean score ng mga mag-aaral mula pre-test (M = 21.722, SD = 4.966) patungong post-test (M = 34.250, SD = 3.894). Bukod dito, ipinakita ng paired sample t-test na ang pag-unlad na ito ay estadistikang makabuluhan, t (35) =20.193 p<.001, na may malaking epekto sa Cohen’s d = 3.366. Ipinakita sa resulta ng post-test na "mataas" ang naging antas ng kasanayan ng mga mag-aaral sa paggamit ng panlapi, na nagpapahiwatig ng malaking pag-unlad mula sa pre-test. Bagama’t epektibo ang interbensyon, may ilang aspeto ng paggamit ng panlapi na nangangailangan pa rin ng karagdagang pagsasanay. Nagkaroon ng malaking epekto ang estratehiya sa pagkatuto ng mga mag-aaral. Sa kabuoan, napatunayan sa pag-aaral na ang paggamit ng Context Clues: “Say It, Teach It, Practice It” ay mabisang interbensyon upang malinang ang kasanayan ng mga mag-aaral sa paggamit ng panlapi, na nakatutulong sa mas mahusay na pag-unawa at mas aktibong partisipasyon sa pagkatuto ng wika. Keywords: Context Clues, Say It, Teach It, Practice It, quantitative-experiment method, Ika-7 baiting, BNVNHS