Kabisaan ng code switching at kahusayan sa pag-uulat sa Filipino sa mga mag-aaral sa Grado 11

Ang pananaliksik na ito ay isinagawa upang tukuyin ang antas ng Kabisaan ng Code Switching at Kahusayan sa Pag-uulat sa Filipino sa mga Mag-aaral sa Grado 11, ng Naile National High School na nakapagtatala sa Taong Panuruan 2025-2026. Sa kabuuan ay walumpu’t limang (85) mag-aaral sa Grado 11 at lahat sila ay isinama sa pag-aaral na ito gamit ang complete enumeration. Survey correlational na pamamaraan ang ginamit sa pag-aaral na ito. Upang masukat ang antas ng kabisaan ng code-switching ng mga mag-aaral, ang mananaliksik ay gumamit ng apatnapung (40) aytem na talatanungang nagtataglay kung paano naging mabisa ang code-switching sa pag-uulat sa Filipinona binuo ng mananaliksik na personal na ginawa sa tulong ng kanyang tagapayo. Upang masukat ang antas ng kahusayan sa pag-uulat sa Filipino ng mga mag-aaral, gumamit ang mananaliksik ng dalawampu’t limang (25) aytem ng rubrik sa pag-uulat. Ang malayang baryabol sa pag-aaral na ito ay ang kabisaan ng code-switching at ang di-malayang baryabol naman ay ang kahusayan sa pag-uulat sa Filipino ng mga mag-aaral sa grado 11. Ang mga kagamitang pang-istadistika ang ginamit ng mananaliksik sa pagsusuri ng palarawang datos tulad ng frequency count, percentage mean, standard deviation, at Pearson r. Ang mga natuklasan ay nagpapakita na sa kabuuan, ang antas ng kabisaan ng code-switching ng mga mag-aaral sa Grado 11 ay “mabisa”. Sa kabuoan, ang antas naman ng kahusayan sa pag-uulat sa Filipino ng mga mag-aaral ay “Napakahusay”. Samantala, lumabas na “Walang makabuluhang kaugnayan” sa pagitan ng mga antas ng kabisaan ng code-switching at kahusayan sa pag-uulat sa Filipno ng mga mag-aaral sa grado 11 sa kabuuan.