ڕۆڵی ڕۆژنامەنووسانی ئەمریکی لە ناساندنی دۆزی کورد لە عێراقدا ١٩٦١-١٩٧٩

   دۆزی کورد لە عێراق، لەدوای دروستبوونی ئەم دەوڵەتە، یەکێک بووە لەم بابەتانەی تاڕادەیەکی گونجاو، لەلایەن ڕۆژنامەگەری جیهانی گرنگی پێدراوە. بەڵام لەگەڵ هەڵگیرسانی شۆڕشی کورد لە ساڵی ١٩٦١ تا کۆچی دوایی ڕێبەری شۆڕش مەلا مستەفا بارزانی لە ساڵی ١٩٧٩، ڕۆژنامەگەری جیهانی بەشێوەیەکی چڕ کاری لەسەر هەموو ئەم بابەتانە کردوە، کە پەیوەندییان بەدۆزی کورد هەبووە لەم ناوچەیە. دیارە ڕۆژنامەنووسانی ئەمریکا، بەهۆی ڕۆڵی دیاریان لەم بوارەدا و هاوکات پەیوەندی ئەم پرسە بە هاوکێشە نێودەوڵەتیەکان، زیاتر ڕووچوونە ناو ئەم باسە. بەم شێوەیە ڕۆڵی پر بایەخیان بینی لە ناساندی دۆزی کورد بەجیهان، لەسەر ئەم بنەمایە ئەم توێژینەوەمان بەناوونیشانی (ڕۆڵی ڕۆژنامەنووسانی ئەمریکی لە ناساندنی دۆزی کورد لە عێراقدا ١٩٦١-١٩٧٩) تەرخانکرد، بۆ باسکردنی سێ تەوەری سەرەکی، جگە لەم پێشەکییەی بۆ ناساندنی توێژینەوەکە ئامادەمان کرد. لەتەوەری یەکەمی بابەتەکەدا کە بەناوونیشانی(پوختەیەکی مێژوویی لەسەر بواری ڕۆژنامەگەری لە ئەمریکا) هاتوە.. تەوەری دووەم کە بەناوونیشانی(ڕۆڵی ڕۆژنامەنووسانی ئەمریکا لەگواستنەوەی وێنای شۆڕشی کورد لە باشووری کوردستان(١٩٦١-١٩٧٥) هاتووە. تەوەری سێیەم کە بەناوونیشانی (ڕۆڵی ڕۆژنامەنووسانی ئەمریکا لە بەرگریکردن لە دۆزی کورد) هاتووە، باسمان لە هەڵوێستی مرۆڤ دۆستانە و هاوسۆزی ڕۆژنامەنووسانی ئەمریکا لەگەڵ دۆز و دۆخی کورد لە عێراق کردوە. دواجار بە چەند خاڵێک کۆی ئەو ئەنجامانەمان خستەڕوو، کە لە کۆتایی بابەتەکە پێی گەیشتین.