Evoluimet kushtetuese në Kosovë, 1945-1974

Në fund të vitit 1944 dhe fillim të vitit 1945 brigadat serbomaqedonase filluan të marshonin në drejtim të Kosovës. Marshimi drejt Kosovës kishte për qëllim ripushtimin e saj nga Serbia dhe zhvillohej në periudhën kur brigadat partizane kosovare ishin dërguar në veri të Jugosllavisë për të luftuar në krah të popujve tjerë sllavë kundër gjermanëve. Rezistenca kundër pushtimit sllavo-partizan që kishte shpërthyer në Ferizaj e Gjilan gjatë muajit dhjetor të vitit 1944 dhe në Drenicë gjatë muajve dhjetor të vitit 1944 dhe janar-shkurt 1945, në një numër që shkonte deri 30000 vetë, ishte shtypur me gjak nga divizionetserbe-malazeze e maqedonase.