Ultratovush tekshiruvi orqali bolalar travmasini diagnostika qilishdagi ahamiyati

Bolalar orasida travmalar — kasallanish va o‘limning yetakchi sabablaridan biri bo‘lib, ichki a’zolarning shikastlanishini o‘z vaqtida aniqlash shoshilinch tibbiyotda muhim vazifadir. Ayniqsa, bolalarda  klinik  belgilar  ko‘pincha  noaniq  bo‘lgani  sababli,  qorin  ichki  a’zolari  jarohatlarini (intraabdominal shikastlanish — IAI) erta tashxislash kechikishlarning og‘ir asoratlarga yoki hatto o‘limga olib kelishini oldini oladi.Hozirda kompyuter tomografiyasi  (KT) qorin va retroperitoneal a’zolarning shikastlanish darajasini  baholashda  “oltin  standart”  hisoblanadi.  Biroq,  KT  tekshiruvida  ionlashtiruvchi nurlanishdan foydalanish bolalar uchun jiddiy xavf tug‘diradi — xususan, takroriy tekshiruvlar uzoq muddatli oqibatlarga, jumladan saraton kasalligi xavfining oshishiga sabab bo‘lishi mumkin. Shu sababli, xavfsiz, invaziv bo‘lmagan va takroran qo‘llash mumkin bo‘lgan diagnostika usullariga qiziqish ortib bormoqda.Ultratovush tekshiruvi (UTT) bolalar travmasini aniqlashda samarali muqobil usul hisoblanadi. Uning asosiy afzalliklari — nurlanish yo‘qligi, qulaylik, invaziv emasligi, tez bajarilishi va bevosita bemor yonida o‘tkazish imkonidir. Travmada yo‘naltirilgan ultratovush tekshiruvi (FAST) hamda uning kengaytirilgan varianti (eFAST) qorin bo‘shlig‘i, yurak atrofidagi parda (perikard) va plevra bo‘shliqlarida erkin suyuqlikni tez aniqlash imkonini beradi. Bu, ayniqsa, gemodinamik jihatdan beqaror bemorlarni baholashda muhimdir.