Fransız dilində feili metaforalar

Xülasə Metafora leksik məcaz növlərindən biridir. Sözlərin polisemiyası onların metaforlaşmasına im­kan verən əsas xüsusiyyətdir. İsim və sifətlərdə olduğu kimi feillərin də metaforlaşması mövcuddur. Feillər cümlədə əlaqəyə girdiyi sözdən asılı olaraq metaforlaşa bilirlər. Bu ilk növbədə həmin feillərin çoxmənalılığından irəli gəlir. Metaforlaşma zamanı hər hansı əşya və hadisəyə məxsus keyfiyyət, xüsusiyyət başqa əşya və hadisə üzərinə köçürülür. Feilin metaforlaşması onun müstəqim yəni həqiqi və köçürmə mənalarının birləşməsindən yaranır. Bu zaman feil məcazi məna ifadə edir. Metaforik feilin mənasını müəyyənləşdirmək üçün onun hansı sözlə işlənməsinə diqqət yetirmək lazımdır. Metaforlaşma zamanı feil öz həqiqi mənasından tamamilə uzaqlaşmır. Feli metaforalar dilin lüğət tərkibini zənginləşdirməklə yanaşı, bədii ədəbiyyat üçün geniş şəkildə obrazlı ifadələrin yaradılmasına xidmət edir. Müasir dövr bədii ədəbiyyatında feli metaforaların geniş istifadə olunması fransızdilli yazıçı Erik – Emmanuel Şmitdin əsərlərindən gətirilmiş nümunələrlə göstərilmişdir. Fransız dilində feli metaforalar bədii ədəbiyyatla yanaşı danışıq dilində də geniş istifadə olunur.